Монголбанкны Мөнгөний бодлогын хорооны гуравдугаар улирлын ээлжит хуралдаан болж, шийдвэрээ өнөөдөр /2022.09.20/ танилцууллаа.
Монголбанкны Ерөнхийлөгч Б.Лхагвасүрэн:
-Мөнгөний бодлогын хороо есдүгээр сарын 16, 20-ны өдрийн хуралдаанаар дараах шийдвэрийг гаргалаа. Бодлогын хүүг хоёр нэгж хувиар нэмж 12 хувьд хүргэх, бодлогын хүүний коридорыг нэмэх, хасах нэг нэгж хувь байсныг хоёр хувь болгож тогтоож өргөтгөх. Мөн гадаад валютын эх үүсвэрийг нэмэгдүүлэх зорилгоор банкуудын 360 ба түүнээс дээш хугацаагаар гадаад зах зээлээс татсан эх үүсвэрийг заавал байлгах эх үүсвэрээс хасч тооцох тухай багц шийдвэр гаргалаа.
Эдгээр шийдвэрийг гаргахдаа гадаад орчны тодорхой бус байдал нэмэгдэж, дэлхийн эдийн засагт сөргөөр нөлөөлж байна. Мөн геополитикийн нөхцөл байдлаас шалтгаалсан глобал эдийн засгийн хямрал, олон оронд эрчим хүчний хямрал үүссэн, дэлхийн улс орнуудын үнийн өсөлт зэрэг нь олон улсын төв банкуудыг бодлогын хүүгээ зайлшгүй огцом чангатгахад хүргэж байгаа юм. Энэ нь зайлшгүй авах арга хэмжээ боловч глобал эдийн засгийн хүрээг хумиж байгааг олон улсын эдийн засаг санхүүгийн байгууллагууд онцолж байна. Манай Улсын худалдааны гол түнш Хятад улсын эдийн засгийн өсөлтийн төлөвийг шинжээчид бууруулж байна.
Дотоод эдийн засгийн хувьд энэ оны эхний хагаст хөл хорионы дэглэм суларч, дотоод эрэлт эрчимжсэнээр эдийн засаг 1.9 хувиар өсч, тэлсэн. Тээвэр, барилга, уул уурхайгаас бусад бүх салбарт өсөлт ажиглагдсан. Эдийн засгийн идэвхжил сэргэж, уул уурхайгаас бусад эдийн засгийн идэвхжил 5,2 хувь байгаа нь дотоод эдийн засаг цар тахлын өмнөх үеийг давсныг илтгэж байна. Сүүлийн гурван улиралд өрхийн хэрэглээ өсч, хөдөлмөрийн зах зээл тэлсэн нь эрэлтийг гэж байна гэж Монголбанк харж байна. Эдийн засгийн суурь төсөөллийг гурван хувьд хүргэхээр нэмэгдүүлж гаргалаа. Гэхдээ энэ нь нүүрсний экспортоос 100 хувь хамаарна.
2022 оны наймдугаар сарын байдлаар инфляц 14.4, Улаанбаатар хотын хэмжээнд 14.8 хувь болж өмнөх саруудаас буурч байна.
Нийт инфляцийн тал хувийг импортын барааны үнийн өсөлтийн шууд нөлөө эзэлж байгаа нь судалгаанаас ажиглагдаж байна. Ирэх улиралд инфляц саарах байдалтай байгаа ч гадаад дотоодын тааварлашгүй хүчин зүйлээс хамаарч, инфляци унахад саад учирч болзошгүй. Сүүлийн улирлуудад түүхий эдийн үнэ өндөр түвшинд хадгалагдсан хэдий ч экспортын биет хэмжээ төдийлөн сэргэж чадаагүйгээс учир урсгал, тэнцлийн алдагдал огцом тэлж, төлбөрийн тэнцэл оны эхний долдугаар сарын байдлаар 1.3 тэрбум ам.долларын алдагдалтай гарсан.
Нүүрсний экспортын орлого хүлээлтээс бага байгаа нь төлбөрийн тэнцэл, валютын орон урсгал, нөөцөд сөргөөр нөлөөлж байна. Тиймээс Мөнгөний бодлогын тохиргоог зайлшгүй хийх, гадаад дотоод тэнцвэрийг зохистой түвшинд хадгалах шаардлагыг нэмэгдүүлж байна. Мөн инфляцийг дунд хугацаанд тогтворжуулах, төгрөгийн харьцангуй өгөөжийг нэмэгдүүлэх зорилгоор бодлогын хүүг өсгөх, хүүний коридорыг илүү өргөн болгох, банкуудын гадаад зарим эх үүсвэрийг заавал байлгах эх үүсвэрээс хасах зэрэг шийдвэр гаргалаа.
Монголбанкнаас цаашид эдийн засгийн байдал сэргэлт, инфляцийн өрнөл, нийлүүлэлтийн доголдол хэрхэн өөрчлөгдөх, гадаад эдийн засгийн төлөвтэй уялдуулан зэргийг харгалзаж мөнгөний бодлогын дараа дараагийн арга хэмжээ авч ажиллах болно.
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.