Прокурорууд Трампын гэр бүлийг залилангийн хэрэгт буруутгаж байна

АНУ-ын экс Ерөнхийлөгч Трамп, түүний гурван хүүхдийн хамаарал бүхий компанийг олон жилийн турш санхүүгийн луйвар хийсэн хэрэгт АНУ-ын прокурорууд буруутгаж байгаа аж. Харин Дональд Трампын зүгээс энэхүү мэдээллийг үгүйсгэж байна.

Нью-Йорк мужийн Ерөнхий прокурор Летитиа Жеймс АНУ-ын Ерөнхийлөгч асан Дональд Трамп, түүний гурван хүүхдийн эсрэг 220 хуудас нэхэмжлэл гаргасан бөгөөд үүнээс гадна шүүхэд Трампын компаниудыг ч дуудаж байна хэмээн есдүгээр сарын 21-ний лхагва гарагийн орой мэдэгдэв.

Олон нийтэд ил болсон мэдээллээр 76 настай улстөрч, түүний хүүхдүүд болон бизнесийн байгууллагуудыг нь олон жилийн  турш санхүүгийн луйвар хийсэн хэргээр буруутгаж байгаа бөгөөд  тэднийг компанийнхаа хөрөнгийн үнэлгээний талаар худал мэдээлэл өгсөн, хөнгөлөлттэй нөхцөлөөр зээл авсан, хуульд зааснаас бага татвар төлсөн гэж үзэж байгаа аж.

Прокурорын газрын мэдээлснээр хөнгөлөлттэй зээлийг Трампын компаниудад Германы томоохон санхүүгийн байгууллага Deutsche Bank олгосон байна. Прокурор мөн Трампын гэр бүлээс 250 сая долларын нөхөн төлбөр төлөхийг шаарджээ.

Хөрөнгийн хуурамч үнэлгээ хийлгэсэн 200 тохиолдол бий гэв

Нью-Йорк мужийн Ерөнхий прокурорын мэдээлснээр Дональд Трамп болон түүний хамаарал бүхий этгээдүүд арван жилийн хугацаанд 200 гаруй удаа хөрөнгийн хуурамч үнэлгээ хийлгэсэн байна. Трампын эзэнт гүрний талаарх мөрдөн байцаалтын ажиллагаа гурван жил үргэлжилж,  65 гэрчээс ярилцлага авч, "сая сая баримт бичгийг" шалгасан байна.

Прокурор Летитиа Жеймс "Дональд Трамп бусдыг хууран мэхлэж, баялгаа хэдэн тэрбум доллараар өсгөж мэдүүлж байсан." гэжээ

Трамп өөрийг нь буруутгасан хэргийг үгүйсгэж байна

"Бид бүгд мэдэж байгаачлан өнөөдрийн яллах дүгнэлтийн баримтууд нь хуульд нийцэхгүй" гэж Трампын өмгөөлөгчийн мэдэгдэлд дурджээ.

Трампын хэлснээр түүнийг улс төрийн хавчлага, золиос болгож байгаа аж. Түүнийг буруутгаж буй прокурор нь өрсөлдөгч намын гишүүн гэдгийг экс Ерөнхийлөгч онцолж байна.

Холбооны мөрдөх товчоо Трампыг нэгжиж байна

Өнгөрсөн наймдугаар сард Холбооны мөрдөх товчоо (ХМТ) Флорида дахь Дональд Трампын гэрт нэгжлэг хийсэн. Тэд Трамп Цагаан ордноос явахдаа авсан байж болзошгүй нууц баримт бичгүүдийг хайсан бөгөөд  “The Washington Post” сонины мэдээлснээр шалгалтын явцад гадаадын аль нэг улсын батлан ​​хамгаалах стратеги, цөмийн чадавхийг тодорхойлсон баримт бичиг илэрсэн гэнэ. 

 Эх сурвалж: DW