Хятадын Коммунист Намын (ХКН) аравдугаар сарын 16-ны өдөр эхлэх “Намын ХХ их хурал”-д оролцох төлөөлөгчдийг сонгон шалгаруулжээ.
" Синьхуа" агентлагийн мэдээлснээр, энэ сарын 25-ны өдөр ХКН-ын зүгээс “Намын ХХ их хурал”-д оролцох 2296 төлөөлөгчийг бүгдийг нь сонгон шалгаруулж дууссан байна.
Төлөөлөгчдийн тоо таван жилийн өмнө буюу “Намын XIX их хурал”-ын (2287) төлөөлөгчийн тооноос есөөр нэмэгджээ.
Коммунист намын зүгээс “Төлөөлөгчид нь намын төв хорооноос тавьсан болзлыг хангасан, улс төрийн өндөр мэдлэгтэй, биеэ зөв авч явах чадвартай, хүсэл зорилготой, салбартаа гарамгай амжилт гаргасан шилдэг намын гишүүдээс бүрдэж байгаа” хэмээн цохон тэмдэглэсэн байна.
Үүний зэрэгцээ зөвхөн намын удирдах албан тушаалтнуудаар тогтохгүй үйлдвэрийн ажилчин, дадлагажигч гэх зэрэг ажилчин ангийн төлөөлөл, эмэгтэй гишүүд, үндэсний цөөнхийн төлөөлөл болсон гишүүдийг эрх тэгш, жигд сонгосон гээд мөн эдийн засаг, шинжлэх ухаан, үндэсний батлан хамгаалах, улс төрийн эрх зүй, боловсрол, суртал ухуулга, соёл, эрүүл ахуй, спорт зэрэг салбар салбарын төлөөлөгчид оролцохоор болсон тухай мэдэгджээ.
Эдгээр гишүүд нь намын их хурлын үеэр Коммунист намын 96.71 сая гаруй гишүүдийг төлөөлж, ирэх таван жилд Хятадыг удирдах Төв хорооны 200 гишүүнийг шинээр сонгохоос гадна Төв хороо, Сахилгын хяналтын төв хорооны ажлын тайланг хянан үзэж намын дүрэмд нэн даруй өөрчлөлт оруулах асуудлыг шийдвэрлэх юм.
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.