Гадаадын арилжааны банк Монголд яагаад үйл ажиллагаа явуулж болохгүй байна вэ, гадны банкны салбарыг Монголд ажиллуулах боломж байна уу гэх асуултад Монголбанкны ерөнхийлөгч Б.Лхагвасүрэн доорх хариултыг өгөв.
Тэрбээр “Өнөөдрийн үйлчилж байгаа Банкны тухай хуулиар хувийн өмчтэй гадаадын банк Монгол Улсад бие даасан салбар байгуулах бүрэн боломжтой. Банкны тухай хуулийн тусгай зохицуулалтаар эхлээд төлөөлөгчийн газраа нээгээд тодорхой хугацааны дараа салбар нээж болно. Монгол Улсад өнөөдрийг хүртэл гадаадын 6 банкны төлөөлөгчийн газар байсан боловч 3 нь гараад явчихлаа. Одоогоор БНХАУ-ын 2 банкны, Япон Улсын нэг банкны төлөөлөгчийн газар байна. Хувийн секторын банк гэдэг үүднээс Японы банк салбараа нээх бүрэн боломжтой. Гэвч өнөөдрийг хүртэл Гадаадын ямар ч банк салбараа нээе гэж Монгол Улсад хандаж байсангүй. Монголбанк хуулийн дагуу шалгаад зөвшөөрөл өгч ажиллах бэлэн байгаа.
Хэрвээ төрийн өмчит банк байвал тусгай хуулийн зохицуулалттай. Эхлээд Засгийн газраас зөвшөөрлөө аваад орж ирэх зохицуулалт байдаг. Өнөөдөр ямар нэг хувийн болон төрийн өмчит банк Монгол улсад салбараа нээе гэж хандаагүй” гэв.
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.