ИРАНЫ ЖАГСАГЧИД: Бие махбодын болон сэтгэл санааны эрүү шүүлтэд өртөж байна

Хенгаме Газани баривчлагдахынхаа өмнө "Юу ч болсон бай, би урьдын адил Ираны ард түмний талд байх болно " гэж бичжээ.

 Ираны хоёр нэрт жүжигчин баривчлагдахаасаа өмнө хижабын эсрэг жагсагчидтай эв санааны нэгдлээ илэрхийлж толгой нүцгэн олон нийтийн өмнө гарчээ.

Ираны төрийн мэдээллийн агентлагийн мэдээлснээр, нэрт жүжигчин Хенгаме Газиани, Катайон Риахи нарыг хуйвалдаан зохион байгуулж, засгийн газрын эсрэг үйл ажиллагаа явуулсан хэмээн буруутгажээ.

Ням гарагт эмэгтэйчүүдийг баривчилсан байна. Хенгаме Газиани баривчлагдахынхаа өмнө "Юу ч болсон бай, би урьдын адил Ираны ард түмний талд байх болно гэдгийг мэдээрэй. Энэ бол миний сүүлчийн бичлэг байж магадгүй" хэмээн жиргэжээ.

Газиани, Риахи нар тус улсын шашны байгууллагыг эсэргүүцсэн жагсагчдыг дэмжиж байгаагаа илэрхийлсэн Ираны нийгмийн нэрт зүтгэлтнүүдийн нэг юм.

Катарт болж буй ДАШТ-д оролцож буй Ираны хөлбөмбөгийн шигшээ багийн ахлагч Эхсан Хайсафи ням гарагт “Манай улсын нөхцөл байдал муу, хүмүүс сэтгэл хангалуун бус байгааг бид хүлээн зөвшөөрөх ёстой” гэж мэдэгджээ.
Ираны боксын холбооны тэргүүн Хоссейн Соори өөрийнх нь эх оронд болсон эсэргүүцлийн жагсаалыг хэрцгийгээр дарж байгаа тул Испанид болсон тэмцээнээс эх орондоо ирэхгүй гэж мэдэгджээ.

Мөн Катарт болсон дэлхийн аварга шалгаруулах тэмцээний үеэр Ираны баг сүлд дуугаа дуулахаас татгалзсан нь эх орондоо болсон эсэргүүцлийн жагсаалыг дэмжиж буйн тод илрэл гэжээ. 

Өнгөрсөн амралтын өдрүүдэд Ираны эрх баригчид улам бүр хүчээ авч байгаа жагсаал цуглааны голомт гэж тооцогддог тус улсын баруун хойд хэсгийн курдуудын бүс нутагт болсон эсэргүүцлийг дарахын тулд цэргийн хүчээ илгээсэн гэж мэдээлсэн.

Эргэн сануулахад  хижабыг хэт чөлөөтэй өмссөн хэргээр цагдаа нарт баривчлагдсан 22 настай курд эмэгтэй Махса Амини нас барсны дараа Иранд өнгөрсөн есдүгээр сард эсэргүүцлийн жагсаал эхэлсэн юм.

Цагдаа нар түүнийг бороохойгоор зодож, толгойгоор нь машин руу цохисон гэж нүдээр харсан  гэрчүүд хэлсэн байдаг. Хоёр хоногийн дараа охин толгойдоо гэмтэл авч ухаан алдаж эмнэлэгт хүргэгдсэний дараа нас баржээ. Харин цагдаа нар үүнийг үгүйсгэж Амини зүрхний шигдээсээр нас барсан гэж мэдэгдсэн юм. 

Есдүгээр сард жагсаал эхэлснээс хойш аюулгүй байдлын хүчнийхэн 400 орчим жагсагчийг хөнөөж, 16 мянга гаруй хүнийг баривчилсан гэж хүний ​​эрхийн төлөө тэмцэгчид мэдэгдэв.

Иран дахь эмх замбараагүй байдлын гурав дахь сараас жагсагчдад цаазаар авах ял оноож эхэлсэн бөгөөд  Ираны эрх баригчид таван жагсагчийг "Аллахын эсрэг дайсагнасан" хэргээр цаазаар авах ял оноогоод байна..

Тегеран дахь хувьсгалт шүүхээс нэр нь үл мэдэгдэх “үймээн дэгдээгчид”-ийн нэг нь цагдааг машинаар мөргөж, хоёр дахь нь хутга, буутай байсан бол гурав дахь нь замын хөдөлгөөнийг хааж, “терроризм” үйлдсэн гэж мэдэгджээ.

Өөр нэг жагсагч хутгатай халдлага үйлдсэн хэрэгт буруутгагджээ.

Хүний эрхийн төлөө тэмцэгчид цаазаар авах ялыг шударга бус шүүхийн үр дүн гэж үзэн эгдүүцэж байна.

Ираны хүний ​​эрхийн "Хенгау" байгууллагын захирал "Байцаалтын шатанд байгаа жагсагчид өмгөөлөгчтэй уулзах боломжгүй,  бие махбодын болон сэтгэл санааны эрүү шүүлтэнд өртөж, хэргээ хүлээсэн үндэслэлээр ял оноодог" гэжээ.

Эх сурвалж: ВВС