К.Айдос авлигын хэрэгт холбогдож, яллах дүгнэлт үйлдэгдсэн ч албан тушаалаа хашсаар байна

Авлигын хэргүүд нь хэрээс хэтэрсэн гэгдэх Авто тээврийн үндэсний төв гэх энэ байгууллагын хурган дарга, авлигын хэрэгт удаа дараа холбогдож, албан үүргээс нь түдгэлзүүлсэн ч албан тушаалаасаа салдаггүй К.Айдос гэж хэн бэ?

К.Айдос нь АТҮТ-ийн Хөдөлгөөний удирдлагын хэлтсийн даргыг 2017 оноос хойш хашиж байна. Уг нь түүнийг өнгөрсөн хавар авлигын хэрэгт холбогдож шалгагдаж байхад АТҮТ-ийн дарга Б.Гүрсоронзон албан тушаалаас нь түдгэлзүүлсэн ч, дахин томилчихоод байгаа юм.

Гэвч Автотээврийн үндэсний төвийн Хөдөлгөөний удирдлагын хэлтсийн даргаар ажиллаж байсан Айдос болон Хөдөлгөөний удирдлагын хэлтсийн мэргэжилтэн М, хяналтын тасгийн авто тээврийн хяналтын мэргэжилтэн О нарын авлигын хэрэгт яллах дүгнэлт үйлдэж, Өмнөговь аймаг дахь Ханбогд сумын сум дундын шүүхэд шилжүүлжээ. Гэвч албан тушаалаасаа салаагүй, түүнийг чөлөөлөөгүй байсаар байна.

К.Айдос нь анх 2017 онд АТҮТ-ийн хэлтсийн даргаар ажиллаж байхдаа 26 сая төгрөгийн орлоготой байсан бол өнгөрсөн он буюу 2021 онд 100 саяыг давсан байдаг.

К.Айдос нь 2017 оноос хойш АТҮТ-ийн Хөдөлгөөний удирдлагын хэлтсийн даргаар ажиллаж эхэлснээс хойш хоёр ч удаа авлигын хэрэгт холбогдон шалгагдаж байгаа.

Нэг. 2017 онд Гашуунсухайт, Ганцмодны хилийн боомтод нүүрс тээвэрлэх автомашины “С” зөвшөөрлийг нүүрс тээврийн компаниудаас авлига авч олгосон хэргээр шалгагдсан. Мөн саатуулагдаж байлаа. Тухайн үед АТҮТ-ийн Тээвэр зохицуулалтын хэлтсийн дарга Д.Батбаяр албан өрөөндөө 20 сая төгрөгийн хахууль авсан нь АТГ-ын гүйцэтгэх ажиллагааны үеэр ил болж байлаа. Улмаар шүүхээс ял сонссон. Энэ хэрэгтэй холбогдуулан Д.Батбаяртай үгсэн хуйвалдаж, авлига хээл хахууль авсан гэх үндэслэлээр К.Айдос болон Ш.Батсайхан нарын хэлтсийн дарга нарыг АТГ шалгаж байв. К.Айдос, Ш.Батсайхан нар нь Д.Батбаяртай үгсэн хуйвалдаж, “С” зөвшөөрөл олгох хууль бус үйлдэлд гар бие оролцдог ноцтой баримт олдсон тухай ч тухайн үед мэдээлэгдэж байсан. АТГ-ын гүйцэтгэх ажиллагааны үеэр АТҮТ-ийнхэн сандралдаж, зарим нь бүр уйлж байсныг тус байгууллагын ажилтан ярьсан байдаг. Эндээс үзвэл Д.Батбаяр ганцаараа авлига авсан биш хамсаатнууд нь байсан гэдгийг илтгэнэ.

Хоёр. 2022.02.18 АТҮД-д АТГ-аас дахин хойшлуулшгүй ажиллагаа явуулж, өнөөх К.Айдос болон С.Онон, Г.Мэндбаяр, Б.Анхтүвшин нарыг саатуулсан. Тэднийг мөн л олон улсын ачаа тээврийн “С” зөвшөөрөл гаргаж, бусдаас хээл хахууль авсан гэж буруутган шалгав. Мөрдөн байцаалт өнгөрсөн хавсраас эхэлсэн ч өнгөрсөн наймдугаар сарын 31 нд тэдний энэ хэргийг АТГ-аас шүүхэд шилжүүлэх саналтайгаар прокурорт шилжүүлжээ. Энэ хэргээс улбаалан түүнийг албан тушаалаас нь түдгэлзүүлсэн хэрнээ хэрэг нь эцэслэн шийдэгдээгүй байхад АТҮТ-ийн дарга Б.Гүрсоронзон дахин албан тушаалд нь эргүүлэн томилжээ.

К.Айдосыг АТҮТ-ийн Хөдөлгөөний удирлагын хэлтсийн даргаар 2017 оноос ажиллаж эхэлснээс хойш жил гаруйн хугацаанд “С” зөвшөөрөлтэй автомшин 1200-аас хоёр дахин нэмэгдэж, 2000 гаруй хүнд даацын автомашинд энэ зөвшөөрөл олгогдсон байдаг. Сүүлийн шалгагдаж байгаа хэрэг нь ч мөн энэ асуудал. Түүнтэй хамт шалгагдаж байгаа мэргэжилтэнгүүд нь ч түүнтэй нэг хэлтэс.

Ер нь ардаа том татаастай, хууль хүчний байгууллагад танил талтай, тэдгээрт нөлөөлж чаддаг “эзэнтэй” этгээдүүд л авлигын хэрэгт холбогдон шалгагдаж, албан үүргээс нь хүртэл түдгэлзүүлчихээд байхад асуудлыг зохицуулж, албан тушаалдаа эргэн томилогдож чадна л даа.