ХЯТАД: Олон нийтийн эсэргүүцлийн дараа ковидын хязгаарлалтыг зөөлрүүлэв

Өнгөрсөн амралтын өдрүүдэд улс орон даяар ковидын хязгаарлалтыг эсэргүүцсэн олныг хамарсан эсэргүүцлийн жагсаал өрнөсөн. Тэгвэл Хятадын эрх баригчид “тэг ковид” бодлогыг тодорхой хэмжээгээр зөөлрүүлж эхэлжээ.

Үүний нэг илэрхийлэл нь эсэргүүцлийн томоохон жагсаал болсон, тухайлбал Шанхай, Гуанжоугийн олон арван дүүргийн хязгаарлалтыг өнгөрөгч  пүрэв гарагт цуцаллаа.

Эргэн сануулахад Урамчи хотоос эхэлсэн жагсаал хүрээгээ тэлж нийслэл Бээжин, Хятадын хамгийн том хот Шанхай, Нанкин, Чэнду, Ухань болон бусад газруудад аяндаа эсэргүүцлийн жагсаал өрнөсөн юм. Жагсагчид уриа лоозонгийн оронд хоосон цагаан цаас барьсаныг хэвлэл мэдээллийнхэн "Цагаан цаасны хуьсгал" хэмээн нэрлэж байв.

Хязгаарлалт, "тэг ковид" бодлогын эсрэг уриа лоозонгуудын дунд Хятад улсын дарга Ши Жиньпинийг огцрох улс төрийн шаардлага гарч ирсэн нь тус улсын хувьд ер бусын зүйл байв. 

Үүнээс өмнө Хятадын удирдлага "тэг ковид" гэсэн хатуу бодлогыг баримталж байсан бөгөөд халдварын хэд хэдэн тохиолдлын улмаас олон зуун хот гэнэт хөл хорионд орж  байсан. Үүний удмаас зарим нэг ноцтой хохирол гарсан. Тухайлбал, Шинжаан-Уйгарын өөртөө засах орны нийслэл Өрөмч хотын нэгэн өндөр байшинд гарсан гал түймэрт яг энэ хөл хорионоос шалтгаалан  10 хүн нас барсан хэмээн оршин суугчид үзэж байгаа. 

Энэ нь Өрөмч хотод олон мянган эсэргүүцлийн жагсаал болж, дараа нь орон даяар тархсан шалтгаан болсон. 

Лхагва гарагт Гуанжоу зэрэг хэд хэдэн томоохон хотод хөл хорио болон хязгаарлалтыг гэнэт цуцалжээ. Энэ шийдвэр тус хотод цагдаа нар болон жагсагчдын хооронд мөргөлдөөн гарснаас хэдхэн цагийн дараа гарсан юм.
Бээжинд эрх баригчид өмнөх шигээ орон сууцны цогцолборуудыг бүхэлд нь хорио цээрийн дэглэмд оруулахын оронд ковидын хөнгөн шинж тэмдэгтэй өвчтөнүүдийг гэртээ тусгаарлахыг зөвшөөрөв.

Цар тахлын эсрэг тэмцэж буй Хятадын хамгийн өндөр албан тушаалтнуудын нэг болох Ерөнхий сайдын орлогч Сун Чонглан вирусын халдварлах чадвар суларч, халдвар буурч байна гэж мэдэгдэв.

"Омикрон хувилбарын эмгэг төрүүлэгч чанар буурч, илүү олон хүн вакцинд хамрагдаж, вирусын эсоэг туршлага хуримтлуулж байгаа тул халдварт өвчнөөс урьдчилан сэргийлэх, хянах шинэ нөхцөл байдал, шинэ сорилттой тулгараад байна" гэжээ.

Түүний энэ мэдэгдлийн дараа Шанхай, Чунцин хотод хязгаарлалтын арга хэмжээг зөөлрүүлэв.

Энэхүү мэдэгдэл нь "тэг ковид" бодлогын талаарх эрх баригчдын өмнөх тайлантай эрс зөрчилдөж байна.

Сүүлийн өдрүүдэд Хятад улс цар тахал эхэлснээс хойшхи дээд халдварын амжилтыг тогтоож,  лхагва гарагт гэхэд л  36,000 гаруй тохиолдол бүртгэгджээ.

Бараг нэг тэрбум хагас тэрбум хүн амтай улсын хувьд энэ тоо тийм ч том тоо биш гэдэг нь үнэн. Хятадад тахал эхэлснээс хойш албан ёсны мэдээллээр 5200 хүн нас бараад байгаа юм.

Энэ нь Хятадад нэг сая хүн тутамд  коронавирусын 3 нас баралт бүртгэгдэж байгаа хэрэг бөгөөд энэ нь жишээлбэл АНУ, Их Британид нэг саяд 3000, саяд 2400  нас баралт гэсэн үзүүлэлтээс харьцангуй доогуур байна.  

Эх сурвалж: ВВС