УКРАИНЫ ДАЙН: Энхийн хэлэлцээ эхэлнэ гэж найдаж болох уу?

АНУ-ын Ерөнхийлөгч Жо Байдены "Сэтгэлд нь юу байгааг ойлгохын тулд Владимир Путинтэй хэлэлцээрийн ширээний ард суухад бэлэн" гэсэн үг, эсвэл Германы Канцлер Олаф Шольц 9-р сараас хойш Оросын удирдагчтай анх удаа нэг цагийн турш утсаар ярьсан яриа...

Мэдээж энэ бүхэн шууд утгаараа  дээд түвшний энхийн хэлэлцээ эхлэх гэж байна гэсэн үг биш.

Гэхдээ хэрэв Оросын удирдагч Украин дахь дайныг зогсоох хүсэлтэй байгаагаа мэдэгдвэл АНУ-ын ерөнхийлөгчийн хэлсэн тэр нөхцөл боломж бий болно. Энэ бүхэн одоогоор хараахан болоогүй байна.

Есдүгээр сарын сүүлчээр Орос өөрийн бүрэлдэхүүнд нэгтгэсэн Украины зарим хэсгийг   Вашингтон хүлээн зөвшөөрөхгүй байна, барууныхан Украиныг зэвсэглэж байна гэж Кремль гомдоллож байгаа. 

Дайн үргэлжилж, Украинд илүү их үхэл, сүйрэл, зовлон зүдгүүрийг заналхийлж буй хатуу ширүүн өвөл эхлэхийн хэрээр энхийн хэлэлцээ хэзээ эхлэх ёстой вэ гэсэн асуулт гарсаар байна.
АНУ-ын Зэвсэгт хүчний штабын дарга нарын нэгдсэн хорооны дарга, генерал Марк Миллигийн хэлэлцээр хийх боломжийг ашиглах шаардлагатай гэсэн сүүлийн мэдэгдлээс хойш албан тушаалтнууд болон барууны удирдагчид Украин хэзээ, хэрхэн хэлэлцээр хийхээ шийдэх ёстой гэж шаардах болсон. 

Францын Ерөнхийлөгч Эммануэль Макрон Цагаан ордонд Жо Байдены дэргэд зогсож байх үеэрээ "Украинчуудын санал бодлыг бид хүндэтгэх ёстой. Ингэснээр тэд ямар үед, ямар нөхцөлд нутаг дэвсгэрийнхээ асуудлаар хэлэлцээ хийхээ өөрсдөө шийдэх ёстой." гэж хэлжээ.
Гэсэн хэдий ч Барууны албаны нэгэн түшмэл  яриа хэлэлцээ хийх цаг хараахан болоогүй байна гэж нотолж  байгаагаа хэлжээ.  Москвагийн зүгээс утга учиртай яриа хэлэлцээ хийхийг  хүсэж байгаа шинж тэмдгийг олж харахгүй байна гэдгээ тэд илэрхийлсэн байна.

Украйны цэрэг одоогоор байлдааны талбарт илүү давуу байдалтай байгаа бөгөөд Оросын цэргийнхэн олон хэцүү сорилттой тулгараад байгаа тул барууны орнууд Оросын зэвсэгт хүчнийг ойрын саруудад одоогийнхоос сул дорой байдалд орно гэж үзэж байгаа мэдрэмж бий.

Барууны өндөр албан тушаалтан саяхан хэлэлцээрийн талаарх хэлэхэдээ "Цаг хугацаа ирнэ, гэхдээ яг одоо болоогүй юм шиг байна. Одоохондоо барууныхны үүрэг бол Украинд цэргийн дэмжлэгээ үргэлжлүүлэн үзүүлэх явдал юм" гэж тэр хэлэв.

Хэрэв ойрын саруудад Украин газар нутгаа эргүүлэн авсаар байвал маргаан улам ширүүснэ. Украины барууны холбоотнууд Киевийн цэргийн зорилгыг дэмжихийн тулд хэр тууштай байна вэ гэдэг нь чухал.

Шулуухан хэлэхэд, хоёрдугаар сарын 24-нд Орос бүрэн хэмжээний түрэмгийллээ эхлүүлж байсан тэр үеийн фронт руу буцах нь нэг хэрэг. Харин 2014 онд ОХУ-ын эзлэн авсан газар нутаг буюу Крым, Донбассын нэлээд хэсгийг буцааж авах тухай бол огт өөр асуудал.

Ямартай ч эдүгээ Пентагон, ОХУ-ын Батлан ​​хамгаалах яам, мөн Тагнуулын төв газрын дарга Уильям Бернс болон түүний Оросын коллеги Сергей Нарышкин нарын оролцсон хэлэлцээ үргэлжилж байна.

Гэвч энхийн хэлэлцээ хэзээ, хэрхэн эхлэх тухай яриа өрнөж байгаа ч бид Украины дайныг дипломат аргаар шийдвэрлэх тэр орон зай цаг хугацаанаас хол хол байгаа бололтой.

Эх сурвалж: ВВС