Засгийн газраас үүсээд байгаа нөхцөл байдалтай холбогдуулан мэдээлэл хийнэ хэмээн дуулиантайхан зарласан боловч өгсөн мэдээлэл нь аль хэдийнэ бидний сонссон цөөн хэдэн хүний нэрийг л тэд ахин дурдаад өнгөрлөө.
Эдийн засгийн хөгжлийн сайд Ч.Хүрэлбаатар “одоогоор 10 гаруй эрүүгийн хэргийг хууль хүчнийхэн шалгаж байгаа гэсэн мэдээлэл ирүүлсэн. Нэр дурдаач, тодорхой мэдээллийг нийтэд ил болгооч гэсэн хүсэлтийг Засгийн газраас тавьсны дагуу “Эрдэнэс Тавантолгой” компанийн захирлаар ажиллаж байсан Д.Ариунболд, Б.Ганхуяг мөн Худалдан авалтын хэлтсийн дарга Б.Отгонжаргал, Дотоод хяналт, эрсдэлийн удирдлагын газрын дарга Х.Нурлат, “Тавантолгой Төмөр зам” ХХК-ийн гүйцэтгэх захирал Н.Удаанжаргал болон холбогдох албан тушаалын хүмүүсийн нэрс ирсэн.
Мөн тээвэртэй холбоотой буюу хилээр нүүрс гаргаж байсан гэдгээр Гаалийн ахлах байцаагч Эрдэнэбаяр, Хил хамгаалах ерөнхий газрын Гашуунсухайт дахь төлөөлөгч Доржжүгдэр, Гаалийн хилийн хамгаалах газрын ажилтан Дэлгэрдалай нарын хүн дээр 10 гаруй эрүүгийн хэрэг үүсгэн шалгаж байна мэдээлэл өгсөн” гэв.
Харин ЗГХЭГ-ын дарга Д.Амарбаясгалан “Эрдэнэс Тавантолгой” ХК-ийн олборлолтын талбайгаас орон нутгийн “Тавантолгой” компани 385 мянган тонн нүүрс олборлосон гэдэг дүгнэлт 2017 онд тодорхой болсон ч өнөөдрийг хүртэл хэргийг шалгаж байгаа. Үүнд, нэр бүхий жижиг Тавантолгой компанийн эзэн, УИХ-ын гишүүн болон Өмнөговь аймгийн Засаг дарга шалгагдаж байгаа. Мөн Тээврийн асуудалтай холбоотой нэр бүхий УИХ-ын гишүүн шалгагдаж байгаа гэдгийг олон нийт мэднэ. Энэ бүх мэдээллийг олон нийтэд ил болгохын төлөө ажиллаж, жагсаал цуглааны нөхцөл байдалтай санал нэг байгаагийн хувьд олон нийттэй хамтарч энэ асуудлыг шийдэхэд зоримог ажиллана гэлээ. Засгийн газар шүгэл үлээгчийн үүргийг хангалттай гүйцэтгэж байгаа гэж хэлж болно. Засгийн газар шууд хуулийн хариуцлага хүлээлгэдэг субъект биш гэдгийг Монголын ард түмэн хангалттай ойлгож байгаа. Хууль хяналтын байгууллагад хууль зөрчсөн холбогдох албан тушаалтныг шилжүүлсэн. Гэм буруутай этгээд тодорхой болсон тохиолдолд улстөрийн болон хуулийн хариуцлагыг хүлээлгэнэ."гэв.
Сэтгэгдэл (3)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.
ЗГ хэрэгжүүлдэг болхоос шүгэл үлээдэг газар биш Амарбаясгалаан.
Амарбаясгалан мэдэн будилах аа боль. Засгийн газар хуулийн хэрэгжилтийг хангадаг болохоос попордог газар биш. Засгийн газрын тал хувь нь хулгайч, ЖДҮчин бхаар яаж ажил хийхэв дээ
Энэ их хурал, засгийн газар энэ хэргийг шийдэж чадахгүй бол МАН улс төрийн тавцангаас арчигдана.