ОХУ хар тамхи зөөвөрлөсөн АНУ-ын сагсан бөмбөгчинг зэвсгийн наймаачин В.Бутаар солив 

ОХУ, АНУ-ын эрх баригчид зэвсэг хууль бусаар худалдаалахыг завдсан, терроризмыг дэмжсэн хэргээр АНУ-д ял сонссон Оросын Виктор Бутыг ОХУ-д хар тамхи зөөвөрлөсөн хэргээр ял сонссон Америкийн сагсан бөмбөгчин Бритни Гринерээр сольжээ. 

Арванхоёрдугаар сарын 8-нд Абу Даби нисэх онгоцны буудалд солилцоо болсон байна. Орос улс Бутыг суллах талаар АНУ-тай удаан хугацааны турш хэлэлцээ хийж байсан гэж ГХЯ мэдэгдсэн боловч Америкийн эрх баригчид  эрс татгалзсан байжээ.

Гэвч АНУ-ын CNN телевизийн суваг АНУ-ын Ерөнхийлөгч Жо Байден өнгөрсөн долоо хоногт хоригдлууд солилцохыг эцэслэн зөвшөөрсөн гэж мэдээлэв. 

Олон улсын хүний ​​эрхийг хамгаалах хорооны Орос дахь салбарын дэд ерөнхийлөгч Иван Мельников хэлэхдээ, солилцооны журмын өмнө Виктор Бут, Бритни Гринер нар өршөөгдсөн тул эх орондоо буцаж ирээд үлдсэн ялыг эдлэх ёсгүй гэж мэдэгдэв. Виктор Бут аль хэдийн Орос эх орондоо ирсэн гэж Мельников хэлэв. 

Мөн Жо Байден хариуд нь Гринер АНЭУ-аас АНУ руу ниссэн гээд  сагсан бөмбөгийн тамирчинтайгаа  ярсан хэмээн мэдэгджээ.

ОХУ-ын Хүний эрхийн асуудал эрхэлсэн комиссар Татьяна Москальковагийн хэлснээр, хэлэлцээрийн үйл явц амжилттай болсон гол гавьяа нь Оросын тусгай албаныхных гэж тодотгов. Тэрбээр мөн Бут буцаж ирснийхээ дараа нэн даруй эрүүл мэндийн үзлэгт орно гэжээ. Бут 13 жил шоронд суугаад  эх орондоо ирж байгаа нь энэ юм. 

Энэ солилцоо Оросын шоронд үлдсэн Пол Уиланы хамаатан садангуудыг бухимдуулжээ
Тодруулахад, ОХУ-д тагнуулын хэргээр ял эдэлж байгаа АНУ-ын өөр нэг иргэн Пол Уилан Мордовын шоронд үлджээ. Уиланы ах хэлэхдээ АНУ-ын засгийн газрын энэ шийдвэр нь түүний гэр бүлд маш их бухимдал үүсгэсэн бөгөөд Пол Уиланы хувьд энэ нь гамшиг болсон гэв.

Гэвч Жо Байден "Бид Орост шударга бусаар хоригдож байгаа Пол Уиланыг мартаагүй" гэж батлав. Тэрээр Оросын эрх баригчдаас түүний ​​эрүүл мэндэд анхаарал тавихыг уриалж, Уиланыг  суллахын тулд Москватай хэлэлцээгээ үргэлжлүүлнэ гэдгээ амлав. CNN-ийн мэдээлснээр Оросын тал Уиланыг солилцохоос эрс татгалзсан бөгөөд сүүлийн үед бүх зүйл АНУ-ын хувьд "Бриттнигээ авах эсвэл юу ч үгүй ​​үлдэх" сонголт руу шилжсэн байна. 

Виктор Бут Америкийн шоронд 14 жилийг өнгөрөөсөн бөгөөд түүнийг 2008 онд АНУ-ын эрх баригчдын хүсэлтээр Тайландад баривчилжээ. 2012 онд АНУ-ын шүүх түүнийг Колумбын Хувьсгалт Зэвсэгт хүчинд (ФАРС) зэвсэг худалдахаар завдсан хэргээр 25 жилийн хорих ял оноосон юм.

АНУ-ын тагнуулын агентлагууд Бутыг дэлхийн хамгийн том хууль бус зэвсгийн наймаачдын нэг гэж нэрлэсэн. Бут Америкийн шоронгийн нөхцөл байдал муу, эмнэлгийн тусламж үйлчилгээ дутмаг байгаа талаар удаа дараа гомдоллож байсан. Цар тахлын үеэр Бут коронавирусын халдвар авч хүнд хэлбэрээр  өвчилсөн ч даван гарч чаджээ. 

Харин Бриттни Гринер Америкийн багаас гадна UMMC Екатеринбургт тоглож байсан. 2022 оны 2-р сард тэрээр Оросын клубт тоглохоор дахин ирэх үедээ Шереметьево нисэх онгоцны буудалд саатуулагдсан. Түүний хувийн эд зүйлсээс хэш тос агуулсан электрон тамхи олдсон байна. Энэ тос нь өвдөлтийг намдаахын тулд АНУ-д бичиж өгсөн бөгөөд 0.702 грамм хар тамхи агуулсан байжээ. Сагсан бөмбөгчин Оросын хууль тогтоомжийг зөрчих бодолгүй байсан гэж мэдэгдсэн юм.  

Гэсэн хэдий ч наймдугаар сард Грейнерийг мансууруулах бодисыг худалдах зорилгогүйгээр хууль бусаар хил давуулсан хэрэгт буруутай гэж үзэн, есөн жилийн хорих ялаар шийтгэсэн юм. Шүүх  сагсан бөмбөгчний гэм буруугаа хүлээн зөвшөөрч, спортын амжилтыг нь харгалзан үзэж хөнгөрүүлсөн нөхцөлөөр ял оноосон гэж тодотгожээ.  

Эх сурвалж: ВВС