Ард иргэд нүүрсний хулгайчийг нэхсэн, харин Ерөнхий сайд...

Ерөнхий сайдын өчигдрийн мэдээллээс онцгой зүйл хүлээж байсан олон хүн 1 цаг 30 минутын ярианаас нь “юу ч ойлгосонгүй”  гэжээ. Тиймээс жагсаал ч үргэлжлэв.  Алдарт сошиал инфлүүсерүүдээс эхлээд энгийн иргэд ч Ерөнхий сайд логикгүй бас лекц маягтай дэмий шахуу баахан зүйл ярилаа хэмээн бухимдсан.

Тэгвэл Ерөнхий сайдын мэдээллээс тоймлон сийрүүлье. Өөрийнх нь хэлснээр асуудлыг хоёр хэсэгт хуваан мэдээлэл өгөв.

 Нэгдүгээрт,

1.1.АН-ын тавьсан Чингис бондын өрийг МАН төлжээ. Ингээд бидний үр хүүхэд ямар ч байсан Чингис бондын өрийг төлөхгүй юм байна.

1.2. Олон нийтийн дэмжлэг авч чадвал олон жил ярьсан асуудлыг бодитой үр дүнд хүргэж болдгийг мэдэрсэн. /Оюутолгой, Эрдэнэт, Хөгжлийн банкны асуудлыг шийдсэн гэв/

1.3. Шүүхийг нүд цавчихгүй харж суугаа юм байна.

1.4.”Эрдэнэс Тавантолгой” ХК-д нүүрсний бизнестэй холбоотой нягтлах зүйл их байгаа юм байна. Наад зах нь борлуулалтын 178 гэрээ байдаг аж.

1.5. “ЭТТ” ХК буюу нүүрстэй холбоотой асуудал түүний өмнө нь тулгарсан асуудлуудаас хамгийн хэцүү нь.  Гэхдээ эцэслэн шийдэж чадна гэдэгт итгэ, хүлээ.

1.6. Ерөнхий сайдад “ Нүүрсний хулгайчид жагсаалыг өөр тийш нь эргүүлэхийг оролдсон. ЭТТ ХК-ийн хуучин удирдлага, тэдний дор ажиллаж байсан Монголын оюутны холбооны үе үеийн удирдлагууд энэ жагсаалыг улстөржүүлэх гэлээ” гэсэн мэдээлэл өгчээ.

1.7.Асуудалд холбогдож байгаа хүмүүс тэгж яривал хамгийн их нүүрс яриад, элдэв мэдээлэл гаргаад байгаа шүү. Ерөнхий сайд больчихоосой л гэж бодоод байгаа аж. Учир нь тэр тэмцлээсээ сөөм ч ухрахгүй. Та нарын тэр нүүрсний хэдэн  төгрөгтэй чинь тэрдээ л юм байгаа биз. Сандарч байгаа хүмүүсээс Ерөнхий сайд ерөөсөө айхгүй байгаа шүү.

Хоёрдугаарт,

2.1 Нэг өдөр парламентын гишүүн байснаас нэг насаараа инфлүүсер байсан нь дээр. Зөвхөн Монгол Улс биш дэлхий өөрөө ийм нөхцөл байдал руу алхаж байгаа гэдгийг сануулав. /За тэгээд парламент гэж юу вэ, яагаад жижиг улс төриийн жижиг намууд энэ босгыг давдаггүй юм бэ гэдгийг бас ярьсан болно/

2.2.Гадна дотны тусгай албаны үйл ажиллагаа гадаад харилцааны стратеги идэвхжиж байгаа төдийгүй цар тахлын дараах геополитик дэлхийд” хүйтэн дайн”-ыг буцаагаад авчирсан.

2.3. Өнөөдрийн эрх мэдэл нь дутаад байгаа учраас хэрвээ сонгодог утгаар нь эрх мэдлийг гарт нь атгуулчихвал уулыг нурааж, усыг эргүүлж чаддаг болох юм байна. Харамсалтай нь Үндсэн хуульд ийм боломж байхгүй учраас Үндсэн хуульдаа шинэчлэл хийнэ.

2.4. Түүнийг Засгийн эрх барьж байх хугацаанд хоёр удаа амаргүй жагсаал болсон ч хаврынхаас бол “айгаагүй”. Харин энэ удаагийн жагсаалаас гал унтрааж, аргацааж болохгүй юм байна. Тэгвэл эрхзүйт төрд нь аюул учирч, парламентын засаглал нэр хүндгүй болж, засаглалын хэлбэр солигдох вий дээ гэдгийг ойлгож, маш их санаа зовсон гэнэ.

2.5. Ерөнхий сайдын хувьд өргөн цар хүрээгээр харж, үндэсний хэмжээний зөвшилцөлд орох нь зөв гэж үзжээ. /Жижиг намууд, иргэний нийгмийн байгууллагууд, иргэдтэй уулзаад уулзаад явчихна/

2.6. Монголын нийгэмд үүсээд байгаа зах замбараагүй олон асуудлыг хамж аваад дүгнэх цаг нь болсон. Ингэж байж ирээдүй рүү зөв чигээр явах трэндийг үүсгэх гэнэ.

2.7. Залуус “Юугаа хүлээгээд байгаа юм бэ” гэсэн бичгүүд өгсөн юм байна.

2.8.Үндсэн хууль болон сонгуулийн тогтолцооны цогц шинэчлэл хийгдсэн тохиолдолд ард түмэндээ дахин сонгох эрхийг нь Ерөнхий сайдын хувьд өгөх аж. 

2.9. Хэрвээ түүний гаргаж тавьсан Шинэ сэргэлтийн бодлого, Засгийн газрынх нь хийж байгаа хулгай луйврыг цэгцэлье гэдгийг дэмжиж байгаа бол Л.Оюун-Эрдэнийг дэмждэг парламентыг бүрдүүлж өг.

2.10. Өнгөрсөн хугацааны тэмцэл, бодлогуудыг нь үргэлжлээсэй гэж хүсч байвал ард түмэн сонголтоо хий. Үгүй гэвэл дүнгээ тавь. Энэ бол сонгодог парламент.

2.11. Ерөнхий сайд  маань заримдаа “за даа” гэж боддог болжээ. Гэр бүлийнхэн нь олон хүний хөл дээр гишгэлээ гэж хэлээд байгаа ч “өөрчлөх ёстой” гэсэн итгэл үнэмшилтэй  зүтгээд байгаа аж.

2.12. Хэвлэл мэдээллийнхэн олон түмэндээ “мэдээллийг заавал нягталж байгаарай” гэж онцгойлон захив.

2.13. Хууль хяналтынхнаас С.Зоригийн хэргийг асууж л байгаа юм байна. Засгийн газар шүүхэд нөлөө үзүүлж болохгүй ч Ерөнхий сайд иргэнийхээ хувиар нүд цавчихгүй хараад л байгаа аж.

2.14. БНХАУ-ын прокурорын байгууллагатай, манай прокурорынхон ямар ч хамтарч ажиллаж байна.

2.15. “”Эрдэнэс Сильвер гэх мэт компанийн “хосыг нэг шувтраад” үзчихээд төрийн анхан дунд шатны хүнд суртал гаргагчид руу ханцуйгаа шамлаад орж явчихна. Төрийн хяналтын мониторинг хийдэг бүтэц бий болсон шүү.  Засгийн газрын үгэнд орохгүй бол хариуцлага тооцоод, тооцоод явчихна гэдгийг төрийн бүх шатанд ажиллаж байгаа нөхөд ойлгоорой. Та нарыг хянах мониторинг ЗГХЭГ-ын дэргэд бий болж байгаа.