М.Цэнгүүн: Намайг сандрахад өвөө маань “Зүгээрээ наадах чинь гүнзгий ус биш ээ” гэж тайвшруулж байсан

Өвлийн усанд сэлэлтийн ДАШТ-ээс алтан медаль хүртсэн М.Цэнгүүнтэй ярилцлаа.

- Өвлийн усанд сэлэлтийн ДАШТ-д өндөр амжилттай оролцсонд баяр хүргэе. Манай уншигчдад өөрийгөө танилцуулахгүй юу?

-Намайг М.Цэнгүүн гэдэг. Би БГД-ийн Усан спорт сургалтын төвд 3 жил хичээллэж байна. Би сэлэхдээ өвөөгөөсөө үлгэр жишээ авдаг. Өвөө маань хурдтай, хүчтэй, чийрэг хүн байдаг. Өвөө шигээ мундаг хүн болох юм сан гэж хүсдэг. Надтай хамт Словени улсын Блед хот руу тэмцээнд явсан. Миний оролцсон тэмцээнд 31 улсын тамирчин оролцсон. Өвлийн усанд сэлэлтийн ДАШТ-ээс хамгийн түрүүнд алтан медаль авахдаа үнэхээр их баярлаж, баярын нулимс унагасан. 50 метрийн мэлхий сэлэлтийн төрөлд алтан медаль, 25 метрийн мэлхий сэлэлтээр мөн алт медаль, 25Х4 багийн буухиа төрөлд мөнгөн медаль хүртсэн.

-Олон улсын анхны тэмцээндээ оролцсон гэж сонссон. Сандрал байсан уу?  

- Хамгийн эхэнд 50 метрт сэлэхэд даарсан “Яана даараад живчих вий дээ” гэж бодсон. Тэр үед манай өвөө “Зүгээрээ наадах чинь гүнзгий ус биш ээ тайвшир” гээд би тэр тухай бодож тайвшраад тэмцээндээ оролцсон. Бусад төрөлд зүгээр байсан.

-Өвлийн усанд сэлэлтийн ДАШТ хэдэн төрлөөр зохион байгуулагддаг вэ. Хэдэн хэмийн хүйтэн усанд сэлсэн бэ?

-Крантны хүйтэн ус +12 градустай байдаг. Харин миний тэмцээний ус +5 градус, илүү хүйтэн гэсэн үг. Би сэлэхээсээ хоёр өдрийн өмнө хүйтэн усанд орж биеэ дасгасан. Миний хувьд ганцхан мэлхий сэлэлтийн техник мэднэ. Өвлийн усанд сэлэлтийн тэмцээн гурван төрөлтэй. Мэлхий сэлэлт, далайн гахай сэлэлт, өврөөр даллах сэлэлт гэсэн 3 төрөл байдаг. Би үлдсэн хоёр сэлэлтийн техникийг сурна гэж бодож байгаа.

-Европт очиход чамд хамгийн их таалагдсан зүйл юу байсан бэ?

-Европт очиход хүмүүс нь соёлтой байсан. Хаашаа ч харсан инээсэн, баярласан хүмүүс. Машинууд нь соёлтой дүрмээрээ явдаг юм байна лээ. Манай Монгол Улс тийм болоосой гэж хүсэж байна.

-Том болоод ямар мэргэжилтэй хүн больё гэж боддог вэ?

-Том болоод эмч болохыг хүсдэг. Манай удамд эмч байдаг. Багаасаа эмч болохыг хүсдэг байсан. Одоо “Күнз” сургуулийн 5-1 ангид сурдаг. Математикийн хичээлдээ маш их дуртай. Тоо бодохоор толгой маань сэргэдэг юм.

-М.Цэнгүүн чөлөөт цагаараа юу хийх дуртай вэ. Бас бэлтгэлээ ямар давтамжтай хийж байна?

-Чөлөөт цагаараа сэлдэг, дуу сонсдог, унтдаг. Сэлэхээр бие чийрэг болж, уурласан үедээ дуу сонсохоор тайвширч, унтахаар энергиэ нөхдөг. Би бэлтгэлээ БГД-ийн Усан спорт сургалтын төвд 7 хоногт зургаан удаа хийдэг. Нэг удаагийн бэлтгэл 2 цаг гаруй үргэлжилдэг. Энэ хугацаанд 1.5 км зайнд сэлдэг. Амьсгалын дасгал хийгээд байх тусам ядардаггүй.

-Ярилцсанд баярлалаа.