Кино урлагийг дэмжих тухай хуулийн хүрээнд "Кино урлагийг дэмжих сангаас санхүүжилт олгох болон банканд тавих шалгуур, банкийг сонгон шалгаруулах, хөнгөлөлттэй зээл олгох, эргэн төлөх, хяналт тавих журам"-ын хэрэгжилтийг ханган Кино урлагийг дэмжих сангаас санхүүжүүлэх төслийн 2023 оны эхний сонгон шалгаруулалтыг тавдугаар сарын 31-ний өдрөөс эхлэн зарлажээ.
Тодруулбал, эргэн төлөгдөх нөхцөлгүй санхүүжилтийн төсөл, эргэн төлөх нөхцөлтэй зээлийн төсөл гэсэн хоёр нөхцөлөөр сонгон шалгаруулалтыг зарлав. Эдгээр нөхцөлд хамаарах дараах ангиллаар төслийг хүлээн авах аж.
Үүнд:
-Кино бүтээх төсөл
-Кино наадам, сургалт зохион байгуулах төсөл
-Кино наадам болон сургалтад оролцох төсөл
-Хамтарсан кино төсөл
Энэ талаар Монголын Үндэсний Кино урлагийн зөвлөлийн гишүүн, кино найруулагч, зохиолч Н.Уранчимэгээс тодруулбал, “Уран бүтээлчид аль ч нөхцөлийг сонгож болно. Кино урлаг чинь өөрөө олон үе шаттай шүү дээ. Зураг авалтын өмнөх үеэс эхлээд эвлүүлэг хийх, сүүлд нь түгээх зэрэг үе шатны алинд ч санхүүжилт авч болно. Дээрээс уран бүтээлийн мэргэших сургалтыг дэмжинэ. Жишээ нь, найруулагч Б.Гарамхандын хүүхдийн сэдэвт гэр бүлийн кино "Алдагдсан өдрүүд” УСК, "Алтан өргөө олон улсын кино наадам", "Ю тийм" ХХК "Амира олон ангит хүүхэлдэйн кино" зэрэг уран бүтээл эргэн төлөгдөхүй нөхцөлтэй.
Төсөл жилд хоёр удаа зарлагдаж байгаа. Энэ бол цэвэр уран бүтээлийн дэмжлэг. Тиймээс энэ бололцоог ашиглан аль болох сайн уран бүтээл хийх хэрэгтэй.
Гэхдээ нэг санхүүжилт авсан хүн дахин, дахин авахгүй. Хамгийн анх авсан дэмжлэгээ юм болгож, хөл дээрээ босоорой гэж бидний зүгээс хүсдэг.
Эргэн төлөх нөхцөлтэй зээлийн төсөл нь үнийн дүн өндөртэй, кино урлагт ямар нэгэн тус дэм болох үйлдвэрлэл буюу дуу оруулах, үнэтэй тоног төхөөрөмж авах зэргээр зээлээ эргэн төлөх боломжтойг нь хэлнэ. Жишээ нь, “Би студи байгуулмаар байна. Өндөр зэрэглэлийн дуу оруулалттай, олон улсын түвшинд хүргэх бүтээл хийхэд дэмжинэ үү. Тоног төхөөрөмж үнэтэй байна санхүүжилт олгооч” гэх мэт хэмээн хэлсэн юм.
Эргэн төлөх нөхцөлгүй санхүүжилт
Кино урлагийг дэмжих сан нь дараах кино бүтээл, төсөл, арга хэмжээнд эргэн төлөх нөхцөлгүй санхүүжилт олгоно. Үүнд:
1. Монгол кино болон хамтарсан кино бүтээл
Монголын түүхийг харуулах олон ангит кино, уран сайхны кино,баримтат кино;
Хүүхэд, залуучуудын хүмүүжил, төлөвшилд эергээр нөлөөлөх олон ангит кино, уран сайхны кино,баримтат кино, анимейшн кино;
Нийгмийн эрүүл мэнд, эрүүл, зөв амьдрах дадал зуршил хэвшүүлэхэд эергээр нөлөөлөх баримтат кино;
Олон улсын кино наадамд өрсөлдөх зорилготой, найруулагчийн хувийн бүтээлч чанар, гоо зүйн үнэлэмж, үзэл бодлын илэрхийллийг харуулах уран сайхны кино болон богино хэмжээний кино (Артхаус кино);
Монголын соёл, ахуй амьдралыг харуулах кино;
Залуу кино найруулагчийн анхны болон хоёр дахь уран сайхны кино,богино хэмжээний кино;
2. Монгол киног хадгалах, сэргээн хөрвүүлэх;
3. Олон улсын кино наадам, үзэсгэлэнд монгол киногоор оролцох,
Монгол Улсад олон улсын кино наадам зохион байгуулах, төрөөс монгол кино урлагийг гадаадад сурталчлах, кино наадамд оролцох;
4. Кино урлагийн уран бүтээлч, ажилтныг хөгжүүлэх,мэргэшүүлэх үйл ажиллагааг зохион байгуулахад тус тус дэмжлэг үзүүлнэ.
Эргэн төлөх нөхцөлтэй санхүүжилт
Дэлхийд өрсөлдөх кино үйлдвэрлэлийг хөгжүүлэх, түүнчлэн Монголын түүх, соёл, ахуй амьдрал, хүүхэд, залуучуудын хүмүүжил, төлөвшилд эергээр нөлөөлөхүйц арилжааны кино бүтээх болон кино үйлдвэрлэлд шаардлагатай дэд бүтцийг сайжруулахад чиглэсэн техник технологи, программ хангамж, инновац нэвтрүүлэхэд эргэн төлөгдөх нөхцөлтэй хөнгөлөлттэй зээлийг арилжааны банкаар дамжуулан олгоно.
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.