Ч.Отгочулуу: Монголд дарга ангийнхан тарвалзаж байна

АН “4:11 мэдээллийн цаг”-аа өнөөдөр Төрийн ордонд хийлээ.

 АН-ын дэд дарга Ч.Отгочулуу, ЕНБД Ч.Өнөрбаяр нар мэдээлэл хийж, өнөөдрийн эдийн засгийн нөхцөл байдал, ҮХНӨ-тэй холбоотой асуудлаар эрх баригч намын барьж байгаа бодлогыг эсэргүүцэв.

АН-ын дэд дарга Ч.Отгочулуу:

Эдийн засгийн нөхцөл байдал цагаар мууддаг боллоо. Шатахууны үнэ ахиад өслөө. Үнийн өсөлт хяналтаас гарах нөхцөл бүрдчихлээ. 2012-2015 онд үүнээс хүнд нөхцөл байдал Монгол Улсад тулгарч байлаа. Нүүрсний үнэ 26 ам.доллар, зэсийн үнэ 4500 доллар, нефтийн үнэ 120 ам.доллараас буудаггүй байсан. Тийм хүнд үед зах зээлд эрх чөлөөг нь өгөх замаар шатахууны үнийг тогтвортой барьж чадсан. Гэтэл өнөөдрийн Засгийн газар гадаад орчинд бүх бурууг тохож, бэртэгчин бодлого явуулж байна. Ковид, ОХУ-Украины дайн гараад багагүй хугацаа өнгөрлөө. Энэ хугацаанд зохицуулалт хийх боломжтой байсан. Өнөөдөр гадаад орчинд эдийн засгийн нөхцөл байдал хүндэрлээ. Дэлхийн эдийн засагт том хямрал үүсээд Монголд нөлөө нь мэдэгдэх нь хэдхэн сарын хугацаа байна. Гэтэл өнөөдөр Монголд дарга ангийнхан тарвалзаж, дунд ангийнхан үнэхээр туйлдаж байна. Гэмт хэргийн статистик харвал өмнөх оны мөн үеэс хоёр дахин өссөн байна. Үүнд өмчийн эсрэг гэмт хэрэг буюу хулгай дээрэм зонхилсон байна. Нөхцөл байдал хүнд байхад манай дарга нар морь малаа эргэж, сонгуулиар дагуулж явах бөхөө тэтгэхээр хөдөө явчихлаа. Үүндээ зориулж хууль  хүртэл баталлаа. Залуус ирээдүйдээ итгэхгүй боллоо. Гадаадад байгаа залуусын Монгол руу явуулж байгаа мөнгөн дээр манай эдийн засаг тогтож байна. Хамгийн ноцтой нь хүүхдийн мөнгө олгодог ирээдүйн өв сан маань ирээдүйн өр сан болсон. Гэтэл хүүхдийн мөнгө тараахтай тэнцэх хэмжээний мөнгөөр эрх баригчид дарга ангийг тендерийн болон хөшөөний мафийг угжиж байна.

Өнөөдрийн 20 настнууд маань 50 нас хүртлээ ажилгүйдэл ядуурал нүүрлэсэн социализмын үеийнх шиг өлөн зэлмэн амьдрах нөхцөлийг МАН бүрдүүлчихлээ гэдгийг хариуцлагатайгаар хэлье.

АН-ын бүлгийн хуулийн зөвлөх О.Баасанхүү:

-АН-ын хуулийн багт тагнуул, хууль шүүхийн байгууллагад ажиллаж байсан хуульчид ажиллаж, ҮХНӨ-той холбоотой асуудлаар бид эрх баригчдыг анхааралтай ажиглаж байна. Бидний зүгээс Г.Занданшатарын ноцтой асуудлыг удахгүй гаргаж тавина. Ордны хуйвалдаанаар төрийн эрх мэдлийг авах гэсэн хүмүүс Үндсэн хуульд халдахыг зөвшөөрөхгүй. Тэр тусмаа зарим нэгэн этгээдүүдтэй нийлж АН-ын бүлэгт халдлаа. Гадаадад суугаа элчин сайд нар нь ажлаа хийж чадахгүй байна. УИХ-ын бүрэн эрхээ хэрэгжүүлэх чадамжгүй байна. Иймэрхүү байдалтай байвал УИХ-ыг тараана.

АН-ын ЕНБД Ч.Өнөрбаяр:

-2019 онд эрх баригчид Үндсэн хуулийн нэмэлт өөрчлөлт хийгээд сүртэй мэдэгдэл хийсэн. Гэтэл авлига, эдийн засгийн хямрал бүх юмны бурууг Үндсэн хууль руу чихээд өнгөрөх гэж байна. Г.Занданшатар даргад анхааруулахад Та бол Үндсэн хуулийг хамгаалахад манлайлах үүрэгтэй. Хоёр жилийн өмнө баахан юм хийгээд Үндсэн хуулийг арван жил хөдөлгөхгүй гэж ярьж байсан. Гэтэл ахиад тонгочуулах гэж байна. Үндсэн хуулиар оролдоно гэдэг бол Монгол Улсаар тоглох гэж буй хэрэг шүү. Үүнийг бид хэзээ ч зөвшөөрөхгүй гэв.