“Эрдэнэс Тавантолгой” ХК-ийн ТУЗ-ийн хараат бус гишүүн Хаянгаагийн Болор-Эрдэнэ ямар "идтэй" хүн бэ

 “Эрдэнэс Тавантолгой” ХК-ийн ТУЗ-ийн хараат бус гишүүний нэг нь Хаянгаагийн Болор-Эрдэнэ. УИХ-ын гишүүн, ХХААХҮ-ийн сайд Хаянгаагийн Болорчулууны төрсөн дүү. Түүнийг 2018 оны 10 дугаар сарын 19-ний өдөр хараат бус гишүүнээс томилоод хуулийн дагуу 2020 оны 10 дугаар сарын 19-ний өдөр чөлөөлсөн ч тухайн өдрөө буцаан томилж, 2022 он буюу өдгөө хүртэл ажиллаж байгаа аж. “Дорнод газар” ХХК-ийн захирал Х.Болор-Эрдэнээс өөр хүн хараат бус гишүүнээс ажиллаж чадахгүй байсан уу, эсвэл энэ хүн үнэхээр сайн ажилласан уу.

Түүний удирддаг “Дорнод газар” ХХК нь гадаад худалдааны чиглэлээр үйл ажиллагаа явуулдаг, төрийн өмчит компаниудын өндөр дүнтэй тендерт ордог, авдаг гэдгийг өмнө нь хэвлэлүүд хангалттай бичсэн.  У.Хүрэлсүхийн Засгийн газрын үед  "Дорнод газар" ХХК нь зөвхөн эрчим хүчний салбараас нэжгээд тендер авсан талаар хэвлэлүүд өнөөдөр ч хөнддөг.

ТУЗ-ийн хараат бус гишүүн ямар эрх, үүрэгтэй юм бэ?

Компанийн тухай хуулийн 79.4-т “Төрийн болон орон нутгийн өмчит компани, 50 буюу түүнээс дээш хувийн төрийн болон орон нутгийн өмчийн оролцоотой компанийн төлөөлөн удирдах зөвлөлийн хараат бус гишүүн энэ хуулийн 76.1, 79.3-т зааснаас гадна дараах эрх, үүрэгтэй: https://legalinfo.mn/mn/detail/310

79.4.1.Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн дагуу зохион байгуулах худалдан авалтын талаар санал боловсруулах;

79.4.2.гүйцэтгэх удирдлагатай байгуулсан гэрээний дагуу бараа, ажил, үйлчилгээ худалдан авах ажиллагааг холбогдох хуулийн зарчимд нийцүүлэн үр ашигтай зохион байгуулж байгаа эсэхэд хяналт тавих” гэжээ.  Тэр ч ямар байсан худалдан авах ажиллагааны талаарх  мэдээлэл авах, ямар нэг байдлаар оролцох эрхтэй хүн аж.

Компанийн ТУЗ хараат бус гишүүнтэй байхын ач холбогдол нь ТУЗ-ийн гишүүд болон гүйцэтгэх удирдлагыг эрх барьж байгаа намын зүгээс томилдог учраас шийдвэр гаргахдаа нэг талыг барих нь бий. Харин хараат бус гишүүд нь асуудлыг бие даасан байр сууринаас харж, шүүмжлэх эрхтэй, үүрэгтэй гэж тайлбарладаг.

Мэргэжлийн гарын авлагад “ТУЗ-ийн ердийн гишүүд болон компанийн ашиг сонирхол зөрчилдөж болзошгүй тохиолдолд хараат бус гишүүдийн оролцоо маш чухал байдаг бөгөөд зах зээлд оролцогчдод тэдний эрх, ашиг сонирхол хамгаалагдаж байгаад нэмэлт баталгаа болж байдаг” хэмээн бичжээ. Харамсалтай нь, "Эрдэнэс Тавантолгой" ХК дээр ТУЗ-ийн гишүүд болоод хараат бус гишүүд нь яг ямар үүрэг гүйцэтгэсэн юм бэ. Яагаад өнөөдрийн байдалд хүргэв. Зөвхөн гүйцэтгэх удирдлагад яагаад бүх эрх мэдлийг төвлөрүүлэв гээд хариултгүй асуулт цөөнгүй бий.

Х.Болор-Эрдэнэ улстөрөөс ангид хүн мөн үү?

Тэрээр намтартаа 2000 онд Хүмүүнлэгийн ухааны сургуулийг герман хэл судлаачаар, тухайн ондоо Цагдаагийн академийг эрх зүйчээр төгссөн гэжээ.Хамтад нь сураад төгссөн бололтой. 2002 онд Германы Хамбург хотын маркетинг менежментийн сургуулийг- олон улсын маркетинг менежмент мэргэжлээр, 2003 онд Английн Лондонгийн коллежийг англи хэл судлаач мэргэжлээр төгссөн гэжээ. Гэтэл 2000-2001 онд мөрдөн байцаагч хийж явсан гэхээр жил дарааллаад улс алгасаар сураад мэргэжил эзэмшсэн болж таарч байгаа юм.

Эсвэл мэргэжил дээшлүүлснээ мэргэжил эзэмшсэн гэж андуурсан уу, ямартай ч их л авьяастай хүн юм. Ингэж боловсроод “Дорнод газар” компаниа байгуулж, удирдаад явж байгаад 2012-2015 онд  Төрийн өмчит “Монгол Росцветмет” компанийн Ерөнхий захирлаар томилогдон ажиллажээ. МАН-ын гишүүн ахтай түүнийг АН-ын Засгийн газар ийм хэмжээний эрх мэдэлтэй суудалд залсан нь гайхамшигтай боловсролыг нь үнэлснийх үү???  Ингэж хэлбэл та итгэх үү. Ахын кнопны ач гэдэг нь захын нэгэнд ч тодорхой. 2015 оноос тэрбээр өөрийн байгуулсан “Дорнод газар” ХХК-ийн гүйцэтгэх захирлаар өнөөдрийг хүртэл ажиллаж байгаа гэж.  2018 оноос "Эрдэнэс Тавантолгой" ХК-ийн ТУЗ-ийн хараат бус гишүүн болжээ. 2020 онд бүрэн эрх нь дуусгавар болсон ч тэр өдрөөсөө ахиад хараат бус гишүүнээр томилогдоод өдгөөг хүрсэн аж. Ингэж ахин дахин томилж,  "Эрдэнэс Тавантолгой" ХК-ийн ТУЗ-д болоод гүйцэтгэх удирдлагад түүнээс өөр "хараат бусаар" хяналт тавиад ажиллачих хүн олдоогүй гэхээр үнэхээр харамсалтай юм. Түүнийг ийн “шат” дамжин гүйж байхад ах Х.Болорчулуун нь УИХ-ын гишүүн, Байнгын хорооны дарга өдгөө Засгийн газрын гишүүн гээд улстөрд нөлөөтэй нэгэн байсаар л...

“Дорнод газар” ХХК нь өндөг шиг өөгүй гэж үү?

Төрийн худалдан авах ажиллагааны цахим систем tender.gov.mn сайтад “Дорнод газар” ХХК нь 2017 оны 03 дугаар сард бүртгүүлжээ. Мэдээллийг шүүж үзвэл энэ хүртэлх хугацаанд 67 тендерт оролцож, нийт 3 тэрбум 147 сая 738 мянга 172 төгрөгийн 10 тендерт шалгарчээ.

Эрчим хүчний салбарт 7, Хөдөө аж ахуйн салбарт 2, МХЕГ-ын нэг тендерийн ажлыг авчээ. Гэхдээ ажлуудаа өндөг шиг өөгүй гүйцэтгэсэн үү гэвэл үгүй. 2017 онд ТЭДС-гийн “Дунд оврын трактор, хүнсний ногооны иж бүрдэл техник нийлүүлэх” тендерт шалгарсан ч тендерийн баримт бичигт заасан шаардлагыг хангаагүй байсан зэрэг асуудал бий. Мөн Дорнод бүсийн эрчим хүчний систем ТӨХК-иас шууд гэрээгээр их хэмжээний ажил авсан гэх мэдээлэл ч бий. Үүнийг тодруулж, дараагийн мэдээллээрээ хүргэе.

Ямартай ч “Дорнод газар” ХХК-ийн захирал Х.Болор-Эрдэнэ Эрдэнэс Тавантолгой ХК-ийн ТУЗ-д цалин горьдож суугаагүй нь лавтай. Үнэхээр эх орондоо хайртай хүн байгаад гүйцэтгэх удирдлагын булхайг илчлээд байсан уу гэвэл үгүй. Тэгвэл тэнд юу хийж суусан юм бол доо.