УИХ дахь АН-ын бүлэг хуралдаж, АН-ын Эвлэрлийн ажлын хэсгийн ажлын явцын талаар хэлэлцсэн тухайгаа өнөөдөр мэдээлэл өгөв. Өнөөдрийг хүртэл даргагүй яваа АН-ыг цэгцлэхээр УИХ дахь АН-ын бүлгээс санаачлан Эвлэрлийн ажлын хэсэг байгуулж, УИХ-ын гишүүн Ж.Батсуурь ахалж байгаа. Энэ хугацаанд ажлын хэсгийн 39 гишүүний оролцоотойгоор 4 удаагийн хурал хийсэн гэнэ. Мөн зөвлөлдөх зөвлөгөөн зохион байгуулж, АН-ын ҮБХ-ны 215 гишүүн оролцсон байна.
Ажлын хэсгийн ахлагч УИХ-ын гишүүн Ж.Батсуурь “2023 оны нэгдүгээр сарын 13-нд АН-ын ҮБХ хуралдана. Маргалдагч талуудын ҮБХ-ны гишүүд оролцоно. Давхардсан тоогоор 400 орчим гишүүн бий.Эдгээрийн 300 орчим нь хуралд оролцохоо илэрхийлсэн учраас үлдсэн хүмүүс нь санал хүсэлтээ хэлж, ирж нэгдэх эрх нь нээлттэй. АН-ын нэр дэвшигчийг сонгох журам, журмын дагуу намын их хурлаа зохион байгуулах, намынхаа удирдлагыг сонгож Дээд шүүхэд хүргүүлэх зэрэг ажлаа энэ долоо хоногтоо багтаж хийнэ гэж төлөвлөсөн” хэмээн ярилаа.
УИХ-ын гишүүн Б.Пүрэвдорж “Х.Баттулга 2021 он хүртэл МАН-тай, У.Хүрэлсүхтэй хамтарч, АН-ыг ялагдалд хүргэсэн. Үүнийг эсэргүүцэгчид нь С.Эрдэнийн талд байсан. Тиймээс АН-ын ҮБХ-д багтдаг эрүүл саруул ухаантай нөхөд ҮБХ болон АН-ын Их хурлыг хуралдуулах гэж байгаа юм” гэв.
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.