“IHC” койн худалдан авсан иргэд: Хэн нэгэн биднийг ав гэж шахаагүй. Гэхдээ койн гаргаж буй биржүүдийг шалгаад өгөөч

“IHC” койн худалдан авч их хэмжээний мөнгөө залилуулж, өөрсдийн автомашин, орон байраа алдсан иргэд болох Б.Сонинцэцэг, Ж.Энхчимэг, С.Дүүрэнбилэг нар мэдээлэл хийлээ. Тэдний зүгээс өөрт байсан койноо хакердуулсан, цахим залиланд өртсөн гэх ерөнхий мэдээллийг өгөв. Мөн ойр дотнынхоо койн авахыг уриалахгүй байж, их хэмжээний мөнгөөр арилжаанд оролцохгүй байхыг зөвлөлөө.

Тэд “Олон мянган хүмүүсийг төлөөлж энд гарч ирлээ. Би анх 140 сая төгрөгөөр элссэн. Өдөр бүр койноо орж хардаг. Хоёр хоногийн өмнө койноо орж үзтэл 6 сая төгрөг болсон байсан. Би хамгийн өндөр үнэ дээр орсон. Би 18 сая койноо дөрөв хоногийн өмнө хакердуулчихсан. Тиймээс цагдаагийн байгууллагад хандаж байна. Энэ үйлдэлд хаанаас хэн хяналт шалгалт тавьдаг бэ? Холбогдох байгууллагууд нь ямар нэгэн мэдээлэл өгөөсэй гэж хүсэж байна. Цагдаагийн байгууллага шалгаасай.

Хэн нэгэн намайг койн ав гэж шахаагүй, орсон нь миний буруу. Гэхдээ дахин дахин хүмүүсийн сэтгэл санааг удирдаж, унахгүй өснө шүү гэсэн сториг нь хараад олон хүн мөнгөө өгч орж байна. Койн авсан өдрөөс эхэлж өдөр бүр уналттай байна. Тийм учраас Монгол Улсад 70-аад койн гаргасан хүмүүсийг шалгаад өгөөсэй гэсэн өргөдөл гаргасан.

Би эрсдэлээ өөрөө үүрэх ч хакердуулсан койноо эргүүлж, олж авах хүсэлтэй байна. Дэлхийн крипто зах зээл өсөж, унаж өөрчлөгдөж байхад манайх шууд унадаг. Бид хөрөнгийн зах зээлийн талаар мэдлэг сайн биш. Бид өөрсдөө эрсдэлээ үүрч койн авсан учраас та бүхнийг цаашид болгоомжтой байгаасай гэж хүсье. Тухайн байгууллагаас үнэ өснө гэдэг итгэл төрүүлдэг учраас би хэн нэгэнд үүнийг худалдан авахыг санал болгосон. Уулзсан хүмүүс маань энэ өснө, ашигтай байна гэх мэтээр хэлж байсан. Би ч ойр тойрныхоо хүмүүс болон аав ээждээ сурталчилсан удаатай” хэмээн мэдэгдсэн юм.

Эргэн сануулахад, О.Мөнхжин, Б.Идэр-Од нарын залуус IHC койныг хөрөнгийн зах зээлд гаргасан. Тухайн үед спортын сэтгүүлч, тайлбарлагч С.Шижирбат "О.Мөнхжин койн гаргаж хүмүүсийг залилж байна" гэсэн утгатай мэдээллийг өөрийн цахим хуудаснаа гаргасан. Харин О.Мөнхжин хариуд нь "Намайг гүтгэлээ. Хүний нэр төрд халдлаа" хэмээн Баянгол дүүргийн Иргэний хэргийн шүүхэд гомдол гаргасан байдаг. Тэгвэл шүүхийн өргөтгөсөн бүрэлдэхүүнтэй хуралдаан болж тус гомдлыг хэлэлцсэн бөгөөд сэтгүүлч, тайлбарлагч С.Шижирбатын талд шийдвэр гарчээ.

Тодруулбал, О.Мөнхжин нь BscScan.com олон улсын крипто валютын сайт дээр IHC койноо гурван өөр цаг хугацаанд гаргажээ. Эхний удаа 2021 оны наймдугаар сарын 18-нд, хоёрдохыг 2021 оны наймдугаар сарын 24-нд гуравдахыг 2021 оны есдүгээр сарын 10-нд гаргасан аж. Тус койноо олон нийтэд зарлаагүй нууц байсан бол дараагийн удаа олон нийтэд зарлаж мөнгө босгосон ч койноо иргэдэд олгоогүй байна. Харин сүүлийн буюу 2021 оны есдүгээр сарын 10-нд гаргасан койноороо гүйлгээ хийсэн гэх мэдээлэл байна. Ингэж гурван өөр цаг хугацаанд ижил нэртэй койн гаргасан нь иргэдийг залилсан үйлдэл гэж шүүх үзсэн байж болзошгүй юм.