Л.Оюун-Эрдэнэ: Барууны орнууд цөмийн шумбагч онгоц зэрэг төсөлд зарцуулж байгаа зардлаа хөгжиж буй орнуудад дэмжлэг үзүүлэхэд чиглүүлэх ёстой

Оюу толгойн гүний уурхайн олборлолт эхэлж, анхны бүтээгдэхүүний үйлдвэрлэж эхэлсэн нь дэлхийн хэвлэл мэдээллийн анхаарлыг зүй ёсоор татаж байна.  Энэ үйл явдлыг сурвалжлахаар 2023 оны гуравдугаар сард олон улсын хэвлэл мэдээллийн washingtonpost.com, reuters.com, yahoo.com, independent.co.uk, chron.com зэрэг агентлагийн сэтгүүлчид Монголд ирж, Монгол Улсын Ерөнхий сайдаас ярилцлага авснаа цацаж эхэлжээ. Хоёр том гүрний дунд оршдог жижиг Монгол Улсын Ерөнхий сайдын байр суурь дэлхий нийтэд сонин байгаа аж. Учир нь, хоёр их гүрний улс төрийн нөхцөл байдлын тогтворгүй байдал, сөргөлдөөн нь Монгол зэрэг улсуудад давхар хохирол учруулж байна хэмээн Ерөнхий сайд Л.Оюун-Эрдэнэ яриандаа онцолжээ.

Тэрээр “Ардчилсан Монгол улс хоёр том авторитори дэглэмтэй гүрний дунд оршдог. Гэсэн ч гуравдагч орнуудтай хийсэн стратегийн түншлэлээ хамгаалах, хөгжүүлэх дээрээс нь хоёр хөршийнхөө эв эеийг сахих нь Засгийн газрын бодлогоос ихээхэн хамаардаг.

Дэлхий дахин шинэ хүйтэн дайны нөхцөл байдал руу гулсан орж байна. Барууны орнууд цөмийн шумбагч онгоцны гэрээ зэрэг төслүүдэд зарцуулж байгаа зардал нь хөгжиж буй орнуудад дэмжлэг үзүүлэхэд чиглэх ёстой.” хэмээн ярьсан аж.

ОХУ Украин руу түрэмгийлснийг буруушаах НҮБ-ын санал хураалтад Монгол Улс түдгэлзсэн санал өгсөн талаар асуусан сэтгүүлчдэд хандан Ерөнхий сайд Л.Оюун-Эрдэнэ  “Хэрвээ та Монгол шиг улсын Ерөнхий сайд байсан бол юу хийх вэ” гэж асуусныг дэлхийн олон хэвлэл мэдээллийн агентлаг мөн онцолжээ.