Х.Нямбаатар: Хэрэгт шалгагдаж байхдаа гадаад руу зугтсан хүмүүсийн дансыг царцаана

Засгийн газрын ээлжит хуралдаанаас өнөөдөр /2023.03.22/ гаргасан шийдвэрийг танилцуулж байна.

Хууль зүй, дотоод хэргийн сайд Х.Нямбаатар "Авлигатай тэмцэх ажлыг эрчимжүүлэх "Шувуу" ажиллагааны хүрээнд гадаад руу оргон зайлсан хүмүүсийн дансыг хааж царцаах чиглэлээр хэрэг мөрдөх байгууллагуудтай хамтарч ажиллах үүрэг даалгавар өгсөн. Энэ чиглэлээр мөрдөх байгууллагуудтай Эрүүгийн хэрэг хянан шийдвэрлэх хуулийн хүрээнд хамтарч ажиллах чиглэлээр үүрэг даалгавар өгсөн.

Би өчигдөр хэвлэл мэдээллийн байгууллагуудад танилцуулсан. Авлигатай Тэмцэх Газар дээр шалгагдаж байгаад мөрдөн байцаалтын шатнаас оргон зайлсан, мөрдөн байцаалтын үйл ажиллагааг тасалдуулж байгаа 18 хүний нэр байгаа. Бусад мөрдөх байгууллагад харьяалагдаж байгаа нийлээд 100 гаруй хүнийг эрж хайх, нутагтаа авчирч мөрдөн шалгах үйл ажиллагааг цаашид хэвийн үргэлжлүүлэх ажлыг эрчимжүүлэх үүрэг чиглэлийг Ерөнхий сайдаас өглөө. Прокурорын тогтоолоор дээрх хүмүүсийн гадаад паспортыг хүчингүй болгож, гадаадад ажиллаж байгаа хүмүүсийн дансыг хааж царцаана. Улмаар гадаад улсуудад мэдэгдэх үүрэг өгсөн. Мөн Монголд нээлгэсэн дансуудыг нь хаахаар болсон гэв.

Мөн "Хувийн сектор чөлөөтэй хөгжих боломжийг хангах үүднээс төрийн байгууллага, албан тушаалтан эс үйлдэл үзүүлж, саад учруулж байгааг Эрүүгийн хуульд тодотгож хуульчилна.

Өмнө нь мөрдөн байцаагчийн саналыг үндэслэж прокурорын тогтоолоор дээрх хүмүүсийн гадаад паспортыг хүчин төгөлдөр бус болгож, гадаад улс орнуудын хилийн шалган нэвтрэх байгууллагууд руу хүргэх үүргийг өгсөн. Энэ ажил хийгдэж байна. Өнөөдөр нэмээд энэ хүмүүсийн санхүүжилттэй холбоотой, өөрсөдтэй нь хамаатай санхүүжилт, гадаадад ашиглагдаж байгаа данс, Монголоос мөнгө шилжүүлж авч байгаа, Монголд нээлгэсэн дансыг хаалгах үүрэг чиглэл болгож байна. Үүнийг хийхдээ мөрдөгчийн саналыг үндэслэж, прокурорын байгууллагатай хамтарч холбогдох банк санхүүгийн байгууллагуудад тогтоолыг үндэслэж хийхээр төлөвлөсөн" гэлээ.