Гаалийн байгууллагын ажилтны гэрээс есөн кг алт, 10 тэрбум төгрөг хураасан гэх мэдээлэл худал болохыг АТГ-аас мэдээлсэн билээ. Тэгвэл уг асуудлаар Гаалийн ерөнхий газрын Хуулийн хэлтсийн дарга Ч.Тамир нэмж тайлбар өглөө.
Тэрээр "Зарим хэвлэл мэдээллийн байгууллага тухайн үед хажууд нь байсан мэтээр бичиж байгаа учир бодит байдлын талаар тайлбар өгье. Гаалийн ерөнхий газар нь бүтцийн хувьд 18 газар, хороотой. Түүний нэг нь Улс хоорондын шуудан илгээмжийн гаалийн газар. Гадаад улсаас Монголд ирж байгаа, Монгол Улсаас гаднын улс руу гаргаж буй захидал, шуудан илгээмжид хяналт тавьж, бүрдүүлдэг. Чиг үүргийн хувьд улс хоорондын шуудан илгээмжийн гаалийн газрын санхүү, нягтлан бодох бүртгэлийн тооцооллыг хийнэ.
Хяналт шалгалт хийх эрх бүхий хуулийн байгууллагаас гаалийн улсын байцаагчийн гэрт нэгжлэг шалгалт хийсэн нь үнэн. Гэхдээ шалгалтын явцад мөнгө, алт хураагаагүй. Тэрээр гаалийн хяналт шалгалтын үйл ажиллагаанд оролцдоггүй. Ийм худал мэдээлэл гарсанд гаалийн байгууллагын зүгээс харамсаж байна.
ГЕГ-ын харьяа Улс хоорондын шуудан илгээмжийн газрын гаалийн улсын байцаагч, нягтлан бодогч С-ийн гэрээс их хэмжээний буюу 9 кг алт, 10 тэрбум төгрөг олоогүй. Тэрээр жирэмсний амралтаа аваад 1 жил 6 сар гаруй болж байгаа. С нь бичиг баримт шалгах, хяналт шалгалт хийх эрхтэй хүн биш. Шуудан илгээмжийн үйл ажиллагаанд оролцдоггүй. Улс хоорондын шуудангийн санхүүгийн тайлан тооцоо л хийдэг. Сүүлийн найман жил хяналт шалгалтын үйл ажиллагаанд оролцоогүй. Хууль хяналтын байгууллагаас авсан мэдээллээр С-ийн гэрээс үл хөдлөх хөрөнгийн 10 гэрчилгээ, 60 мянган рубль гарсан. Үүнийг хуулийн дагуу олсон уу гэдгийг шалгаж байна.
С-ийн гэрээс хурааж авсан валют, эд зүйлийг гаалийн албан үүргээ хэрэгжүүлэхтэй холбоотой олж, авсан хөрөнгө гэж гаалийн байгууллага үзэхгүй байна” хэмээв.
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.