"Би зүгээр л асууж байгаа юм"
Танд эмч нараас зүгээр л асуулт асуух шаардлага хэр олон удаа гарч байсан бэ. Жишээлбэл, энэ эмийг өглөө уух уу эсвэл орой юу. Даралт хэвийн хэмжээнээсээ 10-аар нэмэгдсэн бол яаралтай буулгах шаардлагатай юу, нүд аргаад байна ямар дусаалга дусаах вэ гээд заавал эмч дээр очих шаардлагагүй ч түүнээс асуумаар асуулт тантай байнга тулгардаг биз дээ. Тиймээс л хүмүүс цахим орчныг ашиглаж бие биеэсээ асууж, зөвлөгөө авч, өөрийн өвчний түүх, эмчилгээ зэргийг хуваалцдаг.
АНУ-ын эрүүл мэндийн онлайн хэлэлцүүлгийн хамгийн өргөн ашиглагддаг “Reddit AskDocs” платформ нь зөвхөн тусгай зөвшөөрөлтэй эрүүл мэндийн мэргэжилтнүүдийг нэгтгэсэн бөгөөд тэд хүмүүсийн асуултад хариулт өгдөг. Тэгвэл хиймэл оюун ухаантай тэднийг ижил асуултаар өрсөлдүүлбэл яах бол хэмээх асуулт Калифорнийн их сургуулийн судлаачдын анхаарлыг татжээ. Мэдээж хэрэг, тэднийг дур мэдэн туршилт хийхийг эрүүл мэндийн платформын зүгээс зөвшөөрөхгүй. Тиймээс эрдэмтэд харилцан зөвшилцөөд санамсаргүй түүврийн аргаар 195 асуултыг сонгон жинхэнэ эмч нар болон хиймэл оюун ухаанаас хариултыг хайжээ.
Ингээд өвчтөнүүдийн тусламж хүссэн асуултыг ChatGPT 3.5 хувилбарт ачаалласан байна. Энэ бол хиймэл оюун ухааны тусламжтай хариулдаг чатбот.
“ChatGPT”-аас хариултаа авсны дараа эрдэмтэд жинхэнэ эмч нарын зөвлөгөө өгдөг сайт руу яг энэ асуултаа хуулж тавьсан байна. Ингээд эмч нарын болон “ChatGPT” чатботын хариулт дахь мэдээллийн чанараас гадна эмч нарын мэдээллийн хүртээмжтэй байдал, хүнлэг сэтгэл зэргийг эмч нарт лиценз олгох төвийн шаардлагаар үнэлэхийг хүссэн аж.
"Та жинхэнэ эмч байна!"
Гэтэл “ChatGPT” нь анагаах ухааны үйл ажиллагаа эрхлэх зөвшөөрөл авах шалгалтыг амжилттай давж чадсан байна.
Тодруулбал,
- ChatGPT хариултын 78 хувь нь "маш сайн", "сайн" гэсэн үнэлгээ авсан бол жинхэнэ эмч нарын хариултын ердөө 22 хувь нь ийм үнэлгээ авчээ. Өөрөөр хэлбэл, чатбот эмч нараас 3.6 дахин илүү үр дүн үзүүлжээ.
- "Маш мэдрэмжтэй" ба "мэдрэмжтэй" хэмээн чатботын хариултын 45 хувийг үнэлсэн бол жинхэнэ эмч нарын хариултын 4.6 хувь нь ийм байдлаар үнэлэгдсэн аж. Өөрөөр хэлбэл, хиймэл оюун ухаан "өвчтөний нөхцөл байдлыг ойлгож", тэдэнтэй бараг 10 дахин илүү үр дүнтэй "сэтгэл санааг нь мэдэрч" харилцсан гэнэ.
Ерөнхийдөө хэн ч юу гэж хэлэхээс үл хамааран “ChatGPT” жинхэнэ эмч нар болох зөвлөхүүдээс хамаагүй илүү мэдрэмжтэй, чадварлаг хариулт өгсөн байна.
Өрсөлдөгч биш туслах
"Бидний туршилтын үр дүн хиймэл оюун ухаан бүхий туслахууд нь өвчтөнүүдийн анхан шатны буюу “зүгээр л” асуултын хариултыг эмхэтгэхэд тустай гэдэг нь харагдаж байна" гэж туршилтыг хийсэн эрдэмтэд бичжээ. Өөрөөр хэлбэл, судлаачид цахим орчинд жинхэнэ эмч нарыг чатботоор солих тал дээр эргэлзээгүй гэнэ.
Ер нь “COVID-19” цар тахлын үеэр хүмүүс "виртуал эрүүл мэндийн тусламж үйлчилгээ"-г сонирхох нь ихэссэн гэж эрдэмтэд хэлэв. Өөрөөр хэлбэл, теле-анагаах ухааны зөвлөгөө өгөх үйлчилгээ, гар утасны аппликейшн, тусгай онлайн платформоор дамжуулан өвчтөнд алсын зайнаас үзүүлэх үйлчилгээ урьд өмнө байгаагүй хурдацтай хөгжиж эхэлсэн бөгөөд өнөөдөр бид коронавирусын талаар бараг мартсан ч иргэдийн онлайнаар эмнэлгийн тусламж авах хүсэл эрмэлзэл улам нэмэгджээ.
Калифорнийн их сургуулийн эрдэмтэд " Ирээдүйд энэ технологийг (ChatGPT) эмнэлзүйн орчинд үргэлжлүүлэн судлах нь зүйтэй үзэж байна. Бодит байдал дээр хиймэл оюун ухааныг ашиглах нь эмч нарын ажлыг ачааллыг бууруулж, эмнэлгийн үйлчилгээ, өвчинд нөлөөлөх үр дүнг сайжруулж чадах уу гэдгийг шалгаж үзэх ёстой” гэжээ.
"Энэ оношилгоо, зөвлөгөө бол хяналт, хариуцлагагүй сайхан үгс юм"
Эмч нар хиймэл оюун ухаантай өрсөлдөхөөс айхгүй байна гэж үү? Хиймэл оюун ухаан нь хэрхэн өвчтөнүүдтэй харилцахдаа илүү мэдрэмжтэй, хүнлэг сэтгэлээр хандаж чаддаг вэ? Гэдэг асуултад анагаахын шинжлэх ухааны доктор, профессор, Москва хотын эмч нарын нийгэмлэгийн удирдах зөвлөлийн дарга Павел Воробьев доорхи хариултыг өгчээ.
-Хиймэл оюун ухаан бол мэдээж илүү мэдрэмжтэй гэж бодьё. Эмч нараас хамаагүй дээр үгс өвчтөнд “илгээдэг”. Учир нь энэ бол түүний хийж чаддаг цорын ганц ажил юм. Жинхэнэ эмч ийм заль мэх хэрэглэхгүй. Эмч өвчтөнтэй ажиллахдаа гоё сайхан үгсээр бичихгүй шүү дээ. Хамгийн энгийн тохиолдлуудад хиймэл оюун ухаан нь тухайн сэдвээр боловсруулалт хийж, зөв хариулт өгч чадна. Ингээд өвчтөн “Хөөх, ямар сайхан юм бэ, чатбот намайг геморрой биш, ханиад туссан” гэж тодорхойлсон хэмээн бодох болно. Гэхдээ үүнээс цааш явахгүй. Бодит байдал дээр энэ нь үнэхээр ханиад уу? Эсвэл микоплазмын халдвар уу, ковид уу гэдгийг эмч нарын тусламжтай л ойлгох болно. Харин хиймэл оюун ухаан батлах чадваргүй.
Жишээ нь, миний хамтран ажиллагсдын нэг, нарийн мэргэжлийн эмнэлгийн мэргэжилтэн чатботоос асуулт асуув. Тэр олон арван шинжлэх ухааны өгүүлэл, монографи, номноос бүрдсэн гайхалтай багц хүлээн авсан. Хамтран зүтгэгч маань “Миний ийм олон жилийн туршлагыг зүгээр л минутын дотор ингээд...” хэмээн мэдээж бухимдсан. Тэгээд тэр шалгасан. Харамсалтай нь хэрэг болох нийтлэл нэг ч байгаагүй гэж болно. Тэгэхээр хэрэв анагаах ухаанд хиймэл оюун ухааныг ашиглаж, үүний тусламжтайгаар хүнийг бүрэн оношлогоонд хамрагд гэвэл бурхан минь би лав хориглох болно гэв.
Гэхдээ хиймэл оюун ухаанд эмч нарын цаг завыг их үрдэг энгийн ажлыг өгөх нь зүйтэй гэж шинжээч нар үзэж байна.
Жишээлбэл, өвчтөнтэй ярилцлага хийх, шинж тэмдэг, өвчний түүхийг баримтжуулах. Мөн MRI, CT гэх мэт мэдээллийг боловсруулах. Ийм горим улам бүр машины алгоритмд шилжиж байна. Энэ нь илүү үр дүнтэй гэж байгаа юм.
Эх сурвалж: https://www.kp.ru/
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.