БОАЖЯ: Хар Ус нуур орчмын экосистемийг хамгаалах цогц ажлыг эхлүүллээ

Байгаль орчин, аялал жуулчлалын яам Салбарын хяналтын хэмжээнд 2023 оны тавдугаар сард 145 гомдол, мэдээлэл хүлээн авснаас 78 гомдол мэдээллийг хялбаршуулсан журмаар шийдвэрлэж 20 гомдолд зөрчлийн хэрэг нээн шалгаж шийдвэрлэжээ. Түүнээс найман гомдол, мэдээллийг харьяаллын дагуу шилжүүлж, өнөөдрийн байдлаар 24 гомдол мэдээлэл хяналтад байна. Зөрчил шалган шийдвэрлэх ажиллагааны хүрээнд нийт 90 иргэн, аж ахуйн нэгжид 78,680,000 төгрөгийн торгууль оногдуулснаас 55.630.000 төгрөг буюу (70.7 хувь) төлөгдсөн аж.

Мөн 20 иргэн, аж ахуйн нэгжид 59,502,924 төгрөгийн нөхөн төлбөр оногдуулснаас 25,348,730 төгрөг буюу (42.6 хувь) төлөгдсөн байна.

Дээрх гомдол, мэдээллээс үзэхэд хог хаягдлыг зориулалтын бус газарт хаясан, хууль бусаар ашигт малтмал эрэн хайсан, заг мод бэлтгэсэн, зөвшөөрөлгүй цооног гаргасан, ус ашиглах дүгнэлт, зөвшөөрөл, гэрээгүй ус ашигласан, байгаль орчны нөлөөллийн үнэлгээгүйгээр үйл ажиллаа явуулсан, үнэлгээгээр тавигдсан шаардлагыг биелүүлж ажиллаагүй зэрэг зөрчлүүд нийтлэг илэрчээ.

Хар Ус нуур орчмын экосистемийг хамгаалах цогц ажлыг эхлүүлжээ

Уг ажлын хүрээнд Ерөнхийлөгчийн Тамгын газар, Үндэсний аюулгүй байдлын зөвлөл, БОАЖЯ, Усны газрын хамтарсан ажлын хэсэг Ховд аймагт ажилласан хяналт шалгалтын мэдээллийг танилцууллаа.

Хар ус нуур орчмын экосистемийн бохирдлын шалтгаан,

-Цутгал голуудын бохирдол

-Заарт харх буюу ондатрын тоо хэмжээ хэт нэмэгдсэн нь нуурын экосистемийг алдагдуулсан

-Малаас үүдэлтэй бохирдол

-Суурин газруудын хур хогноос үүдэлтэй бохирдол

-Нуурын эрэг орчимд усны өвс ургамал ургаж замагшсан зэрэг хүний буруутай үйл ажиллагаанаас олон төрлийн бохирдол үүссэн байна.

Тэрбум мод үндэсний хөдөлгөөний хүрээнд Улсын хэмжээнд 2.4 сая мод тарив

2023 онд нийслэл, аймгийн хэмжээнд 42,9 сая ширхэг мод тарихаар төлөвлөсөн ба 21 аймгийн хэмжээнд мод тарих хөдөлгөөн үргэлжилж байна. Урьдчилсан мэдээгээр Улсын хэмжээнд 4000 гаруй байгууллага, 25 мянга иргэдийн оролцоотойгоор 2.4 сая мод тарьсан бөгөөд урд жилүүдэд тарьсан 17 мянга гаруй моддын арчилгааг хийж гүйцэтгэжээ.

Ойн хөнөөлт шавж, өвчний тархалтыг тогтоох судалгааны ажлыг ойн сан бүхий аймгуудад судалгааны гурван үндсэн баг гүйцэтгэж буй аж. Энэ онд ойн хөнөөлт шавж, өвчинтэй тэмцэх ажлыг 185,0 мянган га талбайд гүйцэтгэхээр төлөвлөсөн бөгөөд тэмцлийн ажлын бэлтгэл байдлыг хангаж байгаа гэв.

Аялал жуулчлалын асуудлаар

2023 оны нэгдүгээр сарын 1-нээс тавдугаар сарын 29-ны байдлаар 181,500 жуулчин Монгол Улсад иржээ. Өдөрт дунджаар 1400-1500 жуулчин ирдэг аж. БОАЖ-ын Сайд, ЗТХ-ын Сайдын хамтын ажиллагааны хүрээнд Олон Улсын нислэгүүдийн тоо нэмэгдэж “ThaiViet K way” эйр компани, “JAL” авиа компани Монгол руу шууд нислэг үйлдэхэд бэлэн болжээ.

Мөн БОАЖЯ, Стандарт хэмжил зүйн газар хамтран аялал жуулчлалын салбарын эрдэмтэн, судлаачдын дэмжлэгээр жуулчдын тоо статистикийг боловсронгуй болгох шинэ аргачлал нэвтрүүлжээ. Ингэснээр жуулчдын оруулж буй орлого, сонирхол, аяллын чиглэлийг нарийвчлан тогтоох боломжтой болсон гэв.

Хүрээлэн буй орчны асуудлаар

Аймаг, Нийслэл, сумын нутаг дэвсгэрт үйл ажиллагаа эрхэлдэг, төр хувийн хэвшлийн байгууллагуудын гадна орчны их цэвэрлэгээг тогтмол хийх ажил өрнүүлж эрүүл аюулгүй цэвэр орчин бий болгох, Аялал жуулчлалын бүс нутаг дахь уул овооны хог хаягдлыг тогтмол цэвэрлэх хүрээнд улсын хэмжээнд 46.411 га талбайд иргэд, аж ахуй нэгж байгууллагуудын нийт 42.627 хүн, 10.947 тонн хог хаягдлыг цэвэрлэж төвлөрсөн хогийн цэгт шилжүүлжээ.

Улсын хэмжээнд зүй бусаар болон байгалийн гамшгийн улмаас хорогдсон мал, амьтны 66.803 сэг зэмийг мал эмнэлгийн байгууллагын хяналт доор халдваргүйжлийг хийж, булшилсан байна.

Түүнчлэн аялал жуулчлалын бүсэд болон тусгай хамгаалалттай газарт байгаа 2023 оны тавдугаар сарын 28-ны байдлаар 21 аймгийн стандартын бус 1100 орчим жорлонг буулгасан аж.