Эрдэмтэн Б.Баасансүрэн Саха Якутад зэрлэг цаа судлал, уламжлалт анагаах ухааны чиглэлээр 30 жил ажиллажээ

Биологийн шинжлэх ухааны доктор, анагаах ухааны доктор, Шинжлэх ухааны гавьяат зүтгэлтэн Б.Баасансүрэн “Саха Якутад зэрлэг цаа судлал, уламжлалт анагаах ухаанаар ажилласан 30 жил” үзэсгэлэнгээ нээлээ. Чингис хаан Үндэсний музейд зургаадугаар сарын 7-10-ны өдрүүдэд тус эрхмийн олон жилийн нөр их хөдөлмөр, эрдэм шинжилгээ, судалгааны ажлын үр дүнгнн нэгтгэн, сонирхолтойгоор дэглэн үзүүлжээ.

Б.Баасансүрэн сүүлийн 30 гаруй жил ОХУ-ын Саха Якутад Монголын ШУА-ийн төлөөлөгчөөр томилогдон ажиллаж, хоёр улсын хамтын ажиллагааны гэрээний дагуу хойд туйлын зэрлэг цаа бугын биеийн бүтэц, зарим эрхтнийг судалж, шинэ эм, эмийн бэлдмэл бий болгон хүн зоны өвчин эмгэгийг эмчилж эдгэрүүлэхэд хэрэглэсэн нь ихээхэн амжилт олсон аж. Тухайлбал, чөмөг хөрөх өвчний улмаас хүүхэд олж, тээж төрүүлэх чадваргүй болсон хүмүүсийг эмчилж 170 гаруй гэр бүлийг үр хүүхэдтэй болгож буянт үйл бүтээсэн байна. Энэхүү ажил нь Якутаар зогсохгүй Орос, Австри, Канад, Герман, Япон, Хятад, Солонгос зэрэг дэлхийн олон оронд эрүүл энх өсөн бойжиж байгаа аж. Түүний энэхүү амжилтыг үнэлж ОХУ-ын хөдөө аж ахуйн академийн Алс дорнодын доктор, профессор цолыг олгожээ.

Эрдэм шинжилгээ судалгааны ажлынхаа үр дүнгээр 2000 онд Эрүүл мэндийн шинжлэх ухааны их сургуулийн анагаах ухаанаар докторын зэрэг олгох эрдмийн зөвлөлийн хурлаар “Цаа бугын эврийг Монгол шар тостой хольж төөнө хийх шинжлэх ухааны үндэслэл, цусан эврийн ургалтыг орооны булчирхайн бүтэц үүрэгтэй холбон судалсан нь” сэдвээр анагаах ухааны боловсролын докторын зэрэг хамгаалжээ. Уг судалгааны ажлын үр дүнгээр цааны эврэн шар тосон төөнө хүйсээс доош байрлалтай “хий” хүйтний угшилтай өвчнийг эмчлэхэд маш сайн үр дүнтэй болох нь нотлогдсон гэнэ.

Мөн 2003 онд Монгол Улсын ШУА-ийн биологийн салбарын бага чуулганы дэргэдэх биологийн шинжлэх ухааны докторын зэрэг хамгаалуулах эрдмийн зөвлөлөөр “Цаа бугын зарим эрхтний бүтэц, макро-микро элементийн бүрдэл, тосны хүчлийн найрлагын судалгаа” сэдвээр биологийн шинжлэх ухааны докторын зэргийг амжилттай хамгаалжээ. Энэхүү ажлаараа цаа бугын орооны булчирхайг дорно дахины анагаах ухааны эмчилгээний аргатай хослуулан хэрэглэж үр дүнг бодитойгоор гаргасан аж.