Прокурор: УИХ-ын гишүүн Ё.Баатарбилэг үндэслэлгүй хөрөнгөжиж 330 саяар орон сууц, 133 саяар “Lexus 570” худалдаж авсан

“Хөгжлийн банк”-ны хэргийн шүүх хурал өнөөдөр 40 дэх өдрөө үргэлжилж байна.

Өнөөдрийн шүүх хуралдааны үеэр прокурор УИХ-ын гишүүн Ё.Баатарбилэгийн үндэслэлгүй хөрөнгөжиж, хахуул авсан үйлдэл болон "НВЦ" ХХК-д зээл олгуулахын тулд Хөгжлийн банканд хэрхэн нөлөөлсөн талаарх баримтыг шүүх бүрэлдэхүүн, хэргийн оролцогч нарт танилцуулав.

Ё.Баатарбилэгт нотлох баримтын шаардлага хангахгүй баримтаар хэрэг үүсгэсэн гэж өмгөөлөгч нар нь тайлбарладаг боловч үндэслэлгүй хөрөнгөжсөн нь шалгалтын явцад баримтуудаар тодорхой болсныг прокурор хуралдааны үеэр онцлов.

Тухайлбал УИХ-ын гишүүн Ё.Баатарбилэг 2017.07.18-ны өдөр СБД-т 330 сая төгрөгөөр орон сууц, 2017 оны 10-р сард 133 сая төгрөгөөр Lexus 570 худалдаж авсан бөгөөд орон сууц, автомашин худалдаж авсан мөнгөний эх үүсвэрээ тайлбарлахдаа АТГ-т худал мэдүүлэг өгсөн аж.

Прокурорын танилцуулсан баримтаар УИХ-ын гишүүн Ё.Баатарбилэг хуучин байраа 160 сая төгрөгөөр зарж, УИХ-ын Тамгын газраас 50 сая төгрөгийн тусламж авч, цалингийн орлогоосоо 40 сая төгрөг нэмж СБД-т орон сууц авсан гэж АТГ-т мэдүүлсэн ч удалгүй өгсөн мэдүүлгээсээ буцжээ.  Мөн автомашин худалдан авсан хөрөнгийн эх үүсвэрээ худлаа тайлбарласан байна. Тодруулбал хуучин машинаа 100 сая төгрөгөөр зарж, эхнэр нь 30 сая төгрөгийн цалингийн зээл авч нийт 133 саяар “Lexus 570” худалдаж авсан гэж АТГ-т мэдүүлэг өгчээ. Гэвч хэргийг шалгах явцад Ё.Баатарбилэг нь өмнөх машинаа 100 саяар бус 60 саяар бусдад зарсан нь нотлогдсон байна. Энэ мэтчилэн УИХ-ын гишүүн Ё.Баатарбилэг орон сууц, автомашин худалдаж авсан хөрөнгөө хэрхэн олсноо нотолж чаддаггүй өгсөн мэдүүлэг нь зөрдөг талаар прокурор хэлэв.

Мөн Хөгжлийн банканд нөлөөлж “НВЦ” ХХК-д зээл олгуулсан гэдгийг баримтаар шүүх бүрэлдэхүүнд танилцуулав.

Г.Жав