Г.Нэргүй: Туул, Тэрэлж, Хэрлэн гол дагуу 90 км газарт завьт эргүүл гаргана

Нийслэлийн онцгой байдлын газраас нийслэлийн гамшгийн нөхцөл байдлын талаар мэдээлэл хийлээ. 

НОБГ-ын Гамшгаас урьдчилан сэргийлэх хэлтсийн дарга Г.Нэргүй "Өнөөдрийн байдлаар нийслэлийн хэмжээнд гал түймрийн 857,  аврах ажиллагааны 99 дуудлага, мэдээллээр албан хаагчид шуурхай ажиллаж 1250 орчим иргэний амь насыг аварч ажилласан. Гуравдугаар сард нийслэлийн хэмжээнд өдөрт гал түймрийн 30 дуудлага ирж байсан. Үүнээс урьдчилан сэргийлж "Шар өвс шатахуунтай адил" нөлөөллийн аяныг 3 дугаар сарын 27-ноос 5 дугаар сарын 27-ны өдрүүдэд явуулсан. Мөн НОБГ, Цагдаагийн удирдах газар, Байгаль орчны газар хамтраад 5 дүүргийн ногоон бүсэд хөдөлгөөнт эргүүлийн үүрэг гүйцэтгэсэн. 10743 иргэнд сэрэмжлүүлэг хүргэж ажилласан. 68 удаагийн гал түймрийг газар дээр нь илрүүлж, өнжмөл өвс шатааж цэвэрлэсэн болон гагнуур хийж байсан 54 зөрчлийг илрүүлж газар дээр нь арилгуулж Зөрчлийн тухай хуулийн дагуу хариуцлага тооцож иргэнийг 100 нэгжтэй тэнцэх, ААН 1000 нэгжтэй тэнцэх хэмжээний мөнгөн торгууль ногдуулж ажилласан.

Дорнод, Сүхбаатар, Булган аймагт томоохон ойн түймэр гарч их хэмжээний мал, бэлчээр эд хөрөнгийн хохирол амссан. Нийслэлд хаврын хуурайшилтын үед түймэр гараагүй.  Нодлин нийслэлд 200 гаруй гал түймрийн дуудлага ирсэн энэ жил 68 дуудлага ирсэн нь 75.3 хувиар буурсан үзүүлэлт юм. 

Урин дулаан цаг ирж байгаатай холбогдуулан халуун дулаан өдрүүдэд Туул, Тэрэлж, Хэрлэн голд иргэд гэр бүл найз нөхдөөр амарч зугаалдаг. Энэ үед гол усанд эрсдэх эрсдэл нэмэгддэг. Энэ эрсдлийг бууруулах зорилгоор Нийслэлийн засаг даргын захирамж гарсан. НЦУГ, ОБГ, ГБХЗГ хамтраад 90 км газарт завьт эргүүлийг энэ голуудаар зохион байгуулахаар аврах ангийнхан дадлага сургуульдаа гарсан. Завьт эргүүлийн арга хэмжээ 13 дахь жилдээ зохион байгуулагдаж байна. Энэ сарын 15 наас 9 дүгээр сарын 15 хүртэл энэхүү нөлөөллийн аян үргэлжилнэ. Мөн камер суурилуулсан байгаа. Үүний тоог нь нэмнэ." гэлээ.