Увс аймгийн 505 өвлөн уламжлагчаас 85 нь яаралтай хамгаалах ёстой соёлын биет бус өвийн бүртгэлд байдаг

Налайх дүүргийн Тайж уулын бэлд болж буй “Нүүдэлчин” дэлхийн фестивальд Монгол Улсын 21 аймаг өөр өөрсдийн соёл, уламжлалын онцлогийг зорин ирсэн зочдод үзүүлэн сонирхуулж байна.

Увс аймгийн өвлөн уламжлагч угсаатан Баяд, Дөрвөд, Хотон, Урианхай, Халхчууд үндэсний уламжлалт ардын дуу, икэл, хуур, товшуур, ясан зэрэг хөгжим, бүжиг бий биелгээ, хөөмий, исгэрээ, бөх, морины цол, гэрийн ерөөл, хуримын зан үйл, ан амьтны уриа дуудлага, гар урлал, тоглоом наадгай зэрэг соёлын биет бус өвийн олон төрөл зүйлийг язгуур хэв шинжээр нь хэрхэн хадгалж хамгаалж буйгаараа онцлог гэдгийг тэдний гэрээр зочлон сонирхож болно. Мөн Цагаан улт гутал, Арвайн гурил, Жамц давс, давсан бүтээгдэхүүнээ дэлгэжээ.

Өдгөө Дөрвөдийн алдарт бийч Бадам, Баядын алдарт бийч Жамъянгийн бийлэх, Арван баядын хошууны болоод Баруун Монголын алдарт туульч Маньдханы Парчингийн тууль хайлах өв уламжлал нь тус нутагт сэргэн уламжлагдаж байна.

Увс аймгийн хэмжээнд нийт 505 өвлөн уламжлагч бүртгэлтэйгээс 420 нь Соёлын биет бус өвийн төлөөллийн үндэсний бүртгэлд, 85 нь Яаралтай хамгаалах шаардлагатай соёлын биет бус өвийн бүртгэлд бүртгэлтэй байдаг. Эдгээр өвлөн уламжлагчдаас “Ардын язгуур урлаг” ай савын “Баяд бий биелгээ” өвийг өвлөн уламжлагч М.Жалк гуай “Нүүдэлчин” дэлхийн соёлын фестивальд хүрэлцэн ирж ирээдүй хойч үедээ Баяд бий биелгээн онцлогийг танилцуулан толилуулж байна.