Үндэсний баялгийн сангийн тухай хуулийн төслийг УИХ-ын чуулганаар хэлэлцэж байна. Ерөнхий сайд хуулийн төслийн УИХ-ын чуулганд танилцуулсны дараа гишүүд асуулт асууж, хариулт авсан юм.
УИХ-ын гишүүн О.Цогтгэрэл:
Гол нь энэ хуулинд авлига хулгайг бууруулах иргэдээ баян болгох, эдийн засгийн асуудлуудыг шийдэх зарчмын зүйлс орсонуу гэхээр эргэлзээтэй олон зүйл байна. Жишээ нь, засаглалын асуудал. Байгалийн баялаг төрийн өмчийн удирдлагыг улс төрчдөөс аль болох хараат бус болгох нь энэ баялгийн сангийн хуулийн гол концевц байх ёстой. Гэтэл одоо орж ирсэн хуулийн төсөл дээр 3 сан байх юм байна. Гурван санг нь гурван яамны сайд удирдах юм байна. Хөгжлийн санг-Эдийн засаг хөгжлийн сайд, Ирээдүйн өв санг-Сангийн сайд, Хуримтлалын нэртэй халамжийн санг-Нийгмийн хамгааллын сан удирдах юм байна. Дээрээ нэгдсэн удирдлага зохион байгуулалт байхгүй ийм сан хаана байгааг та бүхэн хэлээд өгөөч? Нүглийн нүдийг гурилаар хуурсан бодлогын баримт бичиг орж ирж байна.
Ерөнхий сайд Л.Оюун-Эрдэнэ: Бид хамтдаа олон удаа ярьсан. Цогтгэрэл даргын хувьд тойрогтоо ажилтай гээд оролцоогүй. Танай намын дарга болон удирдлагууд оролцсон. ХҮН оролцсон. Тухайн үед ярилцсан зарчмаас нэг сөөм ч хазайгаагүй. Ажлын хэсэг байгуулагдаад 10 гаруй удаа хуралдсан. АН-ын саналын дагуу энэ төсөл дээр Тогтворжуулалтын сангийн тухай асуудал огт хөндөгдөхгүйгээр орж ирсэн. Мөн хуримтлалын сантай холбоотой зарим асуудал. Бэлэн мөнгөөр биш орон сууц, боловсрол, эрүүл мэндэд зарцуулагдах нь зүйтэй юм гэдэг агуулгаар орж ирж байгаа. Баялгийн сангууд хоорондоо нэгдсэн удирдлагатай байх ёстой гэж ...Өмнө нь бид ярилцаад тохирчихсон зүйлүүд дээрээ чуулганы танхимд орж ирээд өөр яриад баймгүй л байгаа юм. Ярьсан бол ярьсандаа байхгүй бол Элбэгдорж уурлаагүй байхад нэг өөр, уурласны дараа нэг өөр баймгүй байна. Энэ чинь Монгол Улс. Солигддог тоглоом шиг байж болохгүй. УИХ-ын хэлэлцүүлгийн үед парламентын гишүүд санал бодлоо хэлээд өөрчлөх зүйлүүд бий. Гол нь суурь зарчим дээр лоббинд автахгүй ард нь бол таны хэлдгээр юу ч биш болно. Өмнөх хуулиуд ийм болж байсан.Хэлэлцүүлэгт ороод батлах явцад дандаа лоббинд орж байсан. Тухайлбал, Стратегийн ордуудыг стратегийн орд биш болгож гаргаад өгчихсөн. Өөрөө цаана нь гэр бүлээрээ хувь эзэмшээд суусан олон орд байна. Энэ нь УИХ-ын бүрэн эрх учраас та бүхэн эрдэс баялгийн сонсголоо хийгээд энэ бүгдийг нийгмээрээ мэдэхээр аяндаа нийгмийн дүгнэлт тогтох байх.
УИХ-ын гишүүн О.Цогтгэрэл: Тогтворжуулалтын сан яг энэ Баялгийн сан дотроо алга. Байгалийн баялгийн эрсдэл савлагааг давах ёстой Тогтворжуулалтын сангаа аль ч биш болгоод халамжийн сангийн нэг хэсэг болохоор хуулийн конвенцэд явж байна. Баялгийн сангаа өсөждөг арвиждаг менежменттэй болгох ёстой байтал тийм юм алга.
Ерөнхий сайд Л.Оюун-Эрдэнэ: Тийм учраас үүнийг яриад л, АН-ын саналын дагуу Тогтворжуулалтын сан, Хөгжлийн сан 50:50 байх ёстой гэдэг дээр тогтсон шүү дээ.
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.