Казахстанд болсон парламентын сонгуулийн урьдчилсан дүн гарлаа 

Өнгөрөгч амралтын өдрүүдэд Казакстанд парламентын сонгууль болж өнгөрсөн. Өчигдөр сонгуулийн урьдчилсан  дүнгийн талаар тус улсын хэвлэл мэдээллийнхэн мэдээлжээ. 

Санал хураалтын байдлаас харахад Казахстаны одоогийн эрх баригч "Аманат" нам парламентын ээлжит бус сонгуульд 53,46 хувийн санал авчээ. Энэ тухай Казахстаны хэвлэлүүд Евразийн интеграцийн хүрээлэнгээс явуулсан санал асуулгын дүнгээс иш татан мэдээлэв. Нийгмийн иж бүрэн судалгааны хүрээлэнгийн мэдээлснээр "Аманат" 54.42%,-ийн санал авсан гэжээ. 

Түүнчлэн улс төрийн "Аул" нам  10.52%,  "Республика"нам 8.9%, НПК нам 6.25%, "Байтак" нам  3.22%-ийн санал авсан байна. Үлдсэн  хувийг бусад жижиг намууд хуваан авчээ. 

Намын жагсаалтаар парламентад орох таван хувийн босгыг зургаан нам хангажээ. Харин  "Байтак" ногоон нам энэ шаардлагатай босгыг давж чадаагүй байна.

Казакстаны парламентын сонгуульд депутатуудын 30 хувь нь нэг мандаттай тойргоос, үлдсэн 70 хувь нь намын жагсаалтаар сонгогддог. Өмнө нь Казахстаны парламентын сонгууль 2021 онд болж байсан бөгөөд энэ удаагийн сонгуулийг хугацаанаас нь өмнө зохион байгуулж байгаа юм.

Тус улсын сонгогчдын нэрсийн жагсаалтад бичигдсэн нийт  12 сая сонгогчийн 54.19 хувь нь буюу 6.5 сая хүн Мажилис (Казахстаны парламентын доод танхим) болон Маслихатын (бүс нутгийн парламент) сонгуульд саналаа өгсөн гэж Tengrinews агентлаг тус улсын СЕХ-ноос иш татан мэдээллээ.

Энэ нь сүүлийн арван жилийн хамгийн бага үзүүлэлт юм. Сүүлийн сонгуулиар буюу 2021 онд сонгуулийн ирц 63,3 хувь, 2016 онд 77 хувь, 2012 онд 75 хувьтай байжээ.

Эх сурвалж: Сentralasia.media