Швейцар улсын санхүүгийн зохицуулагч байгууллага 12 банкийг шалгаж, хоёр банканд нь олон жил төв банкны даргаар ажиллаж байсан Риад Саламегийн авлигын хэргээр эрүүгийн хэрэг үүсгэсэн гэж даваа гарагт мэдэгдлээ.
Ливан улсын эрх баригчид олны анхаарлыг татсан хэргийг олон сараар хойшлуулсны эцэст Салеме, түүний дүү Ража болон түүний туслахуудын нэгийг мөнгө угаасан, завшсан, хууль бусаар хөрөнгөжсөн хэргээр өнгөрсөн пүрэв гарагт буруутгав. Саламе ба түүний дүү энэ үйл явцын туршид буруутай үйлдлээ няцааж байсан. Тэрээр пүрэв гарагт Ройтерс агентлагт өгсөн ярилцлагадаа өөрийгөө гэм буруугүй гэдгээ хэлэхийн зэрэгцээ шалгаж байгаа явдал нь "яллах дүгнэлт биш" гэж мэдэгдээд, шүүхийн журмыг дагаж мөрдөхөө амлажээ.
Тодруулбал, Саламе болон түүний дүү Ража нар 2002-2015 оны хооронд Төв банкнаас 300 гаруй сая доллар завшсан эсэхийг Ливан улс 18 сарын турш шалгасны үр дүнд буруутгаж байгаа юм.
Швейцарын Санхүүгийн зах зээлийн хяналтын газар (СЗЗХГ)-ын хэвлэлийн төлөөлөгч "Ливан улсын хувьд СЗЗХГ ойролцоогоор арав гаруй банканд шалгалт хийсэн ба эдгээрээс хоёрт нь шийдвэр гүйцэтгэх ажиллагааг эхлүүлсэн" гэв.
СЗЗХГ нь банканд гарсан доголдлыг илрүүлж, юу нь буруу болсныг тогтоох, цаашид мөнгө угаахтай холбоотой журмыг зөрчихөөс урьдчилан сэргийлэхийн тулд ямар арга хэмжээ авах шаардлагатайг тогтоох зорилгоор гүйцэтгэх ажиллагааг хэрэгжүүлдэг аж. Ноцтой тохиолдолд СЗЗХГ нь банкнуудад арга хэмжээ авч, гэмт хэргийн шинжтэй зөрчилд сэжиглэгдсэн тохиолдолд Швейцарын холбооны прокурорт шилжүүлэх гэнэ.
Ах дүү Саламе Их Британийн Виржиний арлуудад бүртгэлтэй оффшор компани “Форри Ассосиэт”-ээр дамжуулан Швейцарын банкны данс руу 330 сая ам.доллар шилжүүлсэн гэж Швейцарын СоннтагсЦайтунг сонин мэдээлэв. Мөн Европын холбооны хэд хэдэн оронд үл хөдлөх хөрөнгө худалдаж авахад их хэмжээний мөнгө зарцуулсан гэжээ.
Эйч Эс Би Си банкны Женевийн салбар дахь Ража Саламегийн хувийн дансанд 250 сая долларын орлого орсон гэж тус сонинд бичжээ. Бусад мөнгийг ЮБС, Кредит Сюсси, Жулиюс Баер, ИФЖ, Пиктет зэрэг банканд байршуулсан гэж нэмж мэдээлсэн.
Жулиюс Баер, ЮБС, Эйч Эс Би Си, Кредит Сюсси зэрэг банкнууд Ройтерс агентлагт тайлбар өгөхөөс татгалзсан байна.
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.