ПОРНО ОД БА ЕРӨНХИЙЛӨГЧ: Дональд Трампыг хөлдөө чирч буй Сторми Даниэлс гэж хэн бэ 

АНУ-ын Ерөнхийлөгч асан Дональд Трамп порно киноны од Сторми Даниэлс гэгч бүсгүйд 130 мянган ам.доллар төлсөн хэргээр баривчлагдах дээрээ тулаад байна. Прокурорын зүгээс Трамп 2016 оны Ерөнхийлөгчийн сонгуулийн өмнө жүжигчин бүсгүйн амыг хамхиж  чимээгүй байлгах зорилгоор энэ мөнгийг төлсөн гэж үзэж байна.

Трампыг баривчлах тушаал гаргах эсэх шийдвэрийг Нью-Йоркийн дүүргийн прокурор Алвин Брэгг удахгүй гаргах ёстой. Трамп өөрөө үүнийг эрс няцааж байгаа ч эрүүгийн хэрэгт буруутгагдаж буй   Америкийн түүхэн дэх анхны ерөнхийлөгч болно.

Сторми Даниэлс гэж хэн бэ?

Сторми Даниэлс (жүжигчний жинхэнэ нэр нь Стефани Клиффорд) 1979 онд Луизиана мужид төрсөн. Тэрээр насанд хүрэгчдийн кино урлагаар жүжигчний карьераа эхлүүлсэн ч 2004 оноос порно кино бичиж, найруулах болсон.

Тэрээр хэд хэдэн удаа Холливудын жирийн кинонуудад тоглож байсан, тухайлбал, "Knocked Up", "The 40 Year Old Virgin" гэхчлэн. 

2010 онд Даниэлс Луизиана мужаас АНУ-ын Сенатад нэр дэвших хүсэлтэй байгаагаа олон нийтэд зарласан боловч удалгүй энэ төлөвлөгөөгөө орхисон.  Учир нь түүний өөрийнх нь хэлснээр олон сонгогчид түүний нэр дэвших гэж буйг дэмжээгүй юм.

Тэр Трампыг юу гэж буруутгаж байна вэ?
Ирээдүйн ерөнхийлөгчтэй Стормигийн харилцааны түүх 2006 оны 7-р сард эхэлсэн бөгөөд Трамп Цагаан ордон руу нүүх талаар огт бодоогүй, баян бизнесмен, телевизийн алдартай шоунуудын дур булаам хөтлөгч гэдэгтээ сэтгэл хангалуун байсан үе.
Даниэлсийн хэлснээр тэдний анхны уулзалт Калифорниа, Невада мужийн заагт оршдог Тахо нуурын эрэг дээрх амралтын газарт болсон буяны гольфын тэмцээний үеэр болжээ.

Түүний "In Touch Weekly" сэтгүүлд өгсөн ярилцлага 2018 оны 1-р сард нийтлэгдсэн бөгөөд тэнд  Трамп түүнийг хэрхэн оройн хоолонд урьж, өрөөнд нь даган орсон тухай ярьжээ.

Даниэлс яг тэнд, зочид буудлын өрөөнд хосууд бэлгийн харьцаанд орсон гэж мэдэгдээд байгаа бөгөөд үүнийг Трамп өөрөө эрс үгүйсгэж байгаа юм.

Сторми Даниэлс 2018 оны 3-р сард телевизэд өгсөн ярилцлагадаа Трампыг өөрт нь заналхийлсэн гээд болсон явдлын талаар хэнд ч хэлэхгүй байхыг анхааруулжээ.

"Wall Street Journal" сэтгүүлд Трампыг АНУ-ын ерөнхийлөгчийн сонгуульд ялахаас нэг сарын өмнө, өөрөөр хэлбэл 2016 оны 10-р сард ирээдүйн ерөнхийлөгчийн өмгөөлөгч Майкл Коэн жүжигчин бүсгүйд 130 мянган доллар төлсөн тухай нийтлэл гарчээ.

Хэвлэлийн мэдээлснээр, энэ  нь тохиролцооны нэг хэсэг байсан бөгөөд үүний дагуу жүжигчин бүсгүй энэ хэргийг хэвлэлээр болон олон нийтийн өмнө хэлэлцэхгүй гэж амласан байна.

Яагаад хууль бус гэж...
Хатуухан хэлэхэд төлбөрийн баримт нь зөрчил биш юм. Гэвч Трамп  өмгөөллийн хураамж төлсөн гэж баримтжуулсан байна. Нью-Йорк мужийн прокурор энэ үйлдлийг нь Трамп санхүүгийн баримт бичгийг хуурамчаар үйлдсэн гэж үзэж болох бөгөөд энэ нь эргээд эрүүгийн гэмт хэрэг гэж тооцож болно гэж  байна.

Нэр дэвшигч жүжигчин бүсгүйд мөнгө өгсөн гэдгээ нуух гэсэн оролдлого нь гэр бүлээс гадуурх харилцааны талаарх мэдээллийг сонгогчдоос нуух гэсэн санаанаас үүдэлтэй тул онолын хувьд прокурорын байгууллага Трампыг сонгуулийн хууль зөрчсөн гэж буруутгаж магадгүй юм.

Гэхдээ санхүүгийн баримт бичгийг хуурамчаар үйлдэх замаар гэмт хэргийг нуун дарагдуулах гэсэн санаархал нь илүү ноцтой  юм, учир нь албан ёсоор ийм үйлдэл нь захиргааны зөрчил биш, харин эрүүгийн гэмт хэрэг гэж тооцогддог.

Эх сурвалж: ВВС