Монгол Улсын шатрын насанд хүрэгчдийн 61 дэх удаагийн аварга шалгаруулах тэмцээн Ховд аймагт болж байгаа юм. Энэ удаад БНХАУ-ын иргэн "Монгол Улсын шатрын аварга гэж цоллуулах нь ойлгомжтой болжээ.
Тус тэмцээний эрэгтэй ангилалд БНХАУ-ын иргэн 16 настай М.Амилал 6.0 хожилтойгоор тэргүүлж байгаа аж. Араас нь их мастер Г.Мөнхгал, их мастер Б.Билгүүн нар 5.5 хожилтойгоор толгой хэсэгт бичигт бичигджээ.
Одоогоор дүн мэдээлэл гараагүй байгаа ч Монгол Улсын шатрын аваргаар БНХАУ-ын иргэн М.Амилал тодрох нь тодорхой болсон байна.
Улсын аварга шалгаруулах тэмцээний аваргууд эх орноо төлөөлж, олон улсын тэмцээнд оролцох эрх авч, шигшээ багтаа чансаагаар жагсч, цалингийн асуудал ч яригддаг учраас оролцсон тамирчдын зүгээс БНХАУ-ын иргэнийг тус тэмцээнд оролцуулах эрх өгсөн Монголын Шатрын холбооны шийдвэрт дургүйцлээ илэрхийлж байгаа юм.
Тиймээс Шатрын холбооны ерөнхий нарийн бичгийн дарга Х.Эрдэнэдоржтой холбогдож тодруулсан юм.
-Монгол Улсын аварга шалгаруулах тэмцээнд тэргүүлж байгаа тамирчин нь БНХАУ-ын иргэн юм байна. Гадаадын иргэнийг Монгол Улсын аваргаар тодруулах нь зөв үү?
-Тиймээ, багаасаа Монголд амьдарсан юм билээ. Түр оршин суух эрхтэй. Миний хувьд хагас шигшээд оруулахгүй гэдэг саналаа хэлсэн. Төрийн соёрхолт Р.Энхбат багш, гавьяат дасгалжуулагч П.Жигжидсүрэн, багш Г.Энхбаатар нарын зүгээс нэг баг оруулна гээд зүтгэсэн. Миний эрх мэдэл хүрээгүй. Манай холбооны ерөнхийлөгч, тэргүүн дэд ерөнхийлөгч Ховдод байгаа. Одоо яг юу болж байгааг тэднээс асуугаарай. Тамирчдын зүгээс хэл ам гаргаж байгаа бололтой. Ерөнхий нарийн бичгийн даргын хувьд би хэлээд бараагүй.
-Дүрэм журмаараа Монгол Улсын аварга шалгаруулах тэмцээн гэхээр ядаж л Монголын иргэншилтэй хүн л байх ёстой биш үү?
-Би дүрэм журмаа барья, спортын газрынхантай яриад оруулахгүй гэдгээ хэлсэн. Багш нарын зүгээс багаасаа л энд тоглосон гээд оруулна гээд зүтгэсэн. Аав нь Мөнхдалай гээд Өвөрмонгол хүн байсан юм билээ.
Ховд аймагт ажиллаж байгаа Шатрын холбооны ерөнхийлөгч Э.Гурванбаатартай холбогдож тодруулахад “Холбооны зүгээс яг энэ асуудлаар ярилцаж л байна. Одоогоор тодорхой шийдвэр гараагүй байна. Бид ярилцаж л байна” гэсэн мэдээлэл өгсөн.
Сэтгэгдэл (1)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.
Монголчуудын шатрын аварга шалгаруулах тэмцээн биш үү дээ. Монгол Улсын шатрын аварга шалгаруулах тэмцээн. Тэгэхээр Монгол Улсын нутаг дэвсгэрт хуулийн дагуу амьдарч байгаа хэн боловч оролцох эрхтэй шүү дээ. Монгол Улс маань Хүний эрхийн түгээмэл тунхаглалд нэгдэн орсон орон шүү дээ.