Францын  цэцэрлэгт хүрээлэнд хутгатай этгээд хүүхдүүд рүү халджээ

Францын зүүн хэсгийн Анси хотод халдлага болж, дор хаяж зургаан хүн, түүний дотор дөрвөн хүүхэд хутгалуулжээ. 

Хотын ойролцоох нуурын цэцэрлэгт хүрээлэнд 09:45 цагийн үед хутга барьсан этгээд гурван настай хүүхдүүд рүү дайрчээ. Хүүхдүүд багш нартайгаа өглөөний алхалт хийж байжээ.  

Хүүхдүүд рүү дайрсны дараа тэрээр өндөр настанг шархдуулсан бөгөөд зугтах үедээ хөлөндөө буудуулж баривчлагдсан байна.

Францын Дотоод хэргийн сайд Жеральд Дарманин хэлэхдээ, аюулгүй байдлын албаныхан шуурхай ажилласны үр дүнд халдлага үйлдэгчийг баривчилсан гэжээ.

Францын Ерөнхийлөгч Эммануэль Макрон "Улс үндэстэн шоконд орлоо. Энэ бол хулчгар нэгний халдлага" гэж тодотгов. Хүүхэд, нэг том хүн үхэл амьдралын зааг дээр байна гэж тэр хэлэв.

Тухайн явдлыг харсан гэрч хэлэхдээ халдлага үйлдсэн этгээд ямар нэг зүйл хашгирч байсан ч юу хэлж байгааг ойлгох боломжгүй байсан гэжээ. 

Сэжигтэн нь Шведэд дүрвэгчийн статустай, 31 настай Сирийн иргэн болохыг цагдаа нар баталжээ. Түүнийг эхнэр, гурван настай хүүхэдтэй гэж хэвлэлүүд мэдээлж байна.

Цагдаа нарын мэдээлснээр энэ хүн өмнө нь Францын тусгай албаныхны хараанд өртөөгүй байжээ.

Тодруулахад, 135 мянга орчим хүн амтай Анси хот нь Швейцарийн Женевийн ойролцоох Францын Альпийн нуруунд байрладаг.

Эх сурвалж: ВВС