Улсын дээд шүүх Шүүхийн сургалт, судалгаа, мэдээллийн хүрээлэн, Шүүхийн ерөнхий зөвлөл, Монголын шүүгчдийн холбоо, Хэвлэлийн хүрээлэнтэй хамтран “Шүүхийн сэтгүүл зүйн мэргэшүүлэх хөтөлбөр” сургалтыг 2023 оны 9 дүгээр сарын 22-ны өдөр зохион байгуулж байна.
Сургалтад хууль эрх зүй, эрэн сурвалжлах чиглэлээр мэргэшиж ажилладаг сэтгүүлчид болон өмгөөлөгч, судлаачид оролцож байгаа юм.
Улсын дээд шүүхийн Захиргааны хэргийн танхимын тэргүүн Д.Мөнхтуяа “Монгол Улсын шүүх, шүүхийн шинэтгэлийн өнөөгийн байдал” сэдвийн хүрээнд сэтгүүлчдэд мэдээлэл өгөв. Тэрбээр шүүхийн тогтолцоо, чиг үүрэг, шүүн таслах ажиллагааны дараалал, хэрэг хянан шийдвэрлэх ажиллагааны үе шат, хугацаа, хуулийг зөв хэрэглэх талаар албан ёсны тайлбар гаргах Улсын дээд шүүхийн бүрэн эрхийн тухай ярьж, сэтгүүлчидтэй хэлэлцүүлэг өрнүүллээ. Мөн шүүхийн шийдвэрийг олон нийтэд ойлгомжтой байдлаар мэдээлэх зорилготой шүүхийн шийдвэрийн тойм бэлтгэх болон ил тод, нээлттэй байдлыг хангах талаар хэрэгжүүлж байгаа арга хэмжээний тухай товч танилцуулсан юм.
Монголын шүүгчдийн холбооны тэргүүн, Нийслэлийн Эрүү, Иргэний хэргийн давж заалдах шатны шүүхийн шүүгч, доктор, дэд профессор Ж.Оюунтунгалаг “Мэргэжлээрээ нийгмийн үнэт зүйлийг бүтээх нь” сэдвээр цахимаар хичээл заалаа. “Шүүхийн ил тод байдал” сэдвээр Шүүхийн ерөнхий зөвлөлийн гишүүн А.Отгонцэцэг мэдээлэл өгч, сэтгүүлчдийн асуултад хариулав.
Сургалтын дараагийн хэсэгт Хэвлэлийн хүрээлэнгийн мэргэжилтэн Б.Мөнгөнзаяа “Шүүх ба хэвлэл мэдээлэл, тэдгээрийн үүрэг”, тус хүрээлэнгийн сэтгүүл зүйн багш Т.Есөн-Эрдэнэ “Шүүх үйл ажиллагааны талаар хэрхэн сурвалжлах вэ”, “Өнөөдөр” сонины Эрэн сурвалжлах, экологийн мэдээний албаны дарга Г.Цолмон “Шүүхийн үйл ажиллагааг сэтгүүл зүйн бүтээл болгох нь”, криминологич, доктор, дэд профессор Б.Батзориг “Шүүхийн тухай ташаа мэдээлэл ба холбогдох хууль эрх зүй” сэдвээр мэдээлэл хийж, хэлэлцүүлэг өрнүүлэх юм.
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.