“Сайн байна уу, та ХНХ-ын сайд Булгантуяаг таних уу?” гэх асуултыг Баянзүрх дүүргийн иргэдээс утсаар асуух болсон гэнэ. Юу вэ, хэн бэ гэхээр яамны нэг мэргэжилтэн байна гэх хариулт өгч...
Өөрөөр хэлбэл, давхар дээлтэй сайд нар сонгогдсон дүүрэг, хороондоо танигдсан эсэхдээ тун эргэлзэж байгаа бололтой.
Ч.Хүрэлбаатар сайд ч Ховдын байгалийн сайхныг магтаад пост бичиж харагдана. Монгол хүн юм чинь эх орныхоо байгалийн сайхнаар бахархах нь зүй л биз. Гэхдээ л бахархал нь сонгуулийн томсгосон тойргоор хязгаарлагдаж буй. Сонгуулийн өмнөх дүр зургууд цаашид иймэрхүү байдлаар хөвөрнө.
2024 оны сонгуулийн онцлог бол энэ. Нэрээ тойрогтоо сайн таниулах тусам УИХ-д сонгогдох магадлал өснө. Магадгүй “Танихгүй бурхнаас таньдаг чөтгөр дээр” гэх зүйрлэл 2024 оны сонгуулийн өнгийг тодорхойлох нь.
Тухайлбал, ЗГХЭГ-ын дарга Д.Амарбаясгалангийн хувьд Говь-Алтайгаас нэр дэвших нь тодорхой байсан ч уугуул нутгаасаа гадна Увс, Завхан, Ховдод өөрийгөө таниулах шаардлагатай болоод буй. Зудын “ачаар” нэг бодлын хэдэн сайд нар тойрог "услах" ажлаа гүйцэтгэхийн завсар сонгуулийн өмнөх өөрийгөө таниулах сурталчилгааг ч хийгээд авлаа.
Уг нь, Сонгуулийн Ерөнхий хорооны цахим сайтад дөрөвдүгээр сарын 1-нээс сонгогчдын нэрсийн жагсаалтыг нээлттэй байршуулна гэх хуулийн заалт байгаа. “Миний гэрт урилгагүй зочин байна уу” гэдгийг сонгогч бүр шалгах боломж нь нээлттэй. Хэрвээ сонгогч бүр УИХ-ын сонгуульд хариуцлагатай, идэвхтэй оролцдог бол бид нүүрсний хулгай, ЖДҮ, Хөгжлийн банкны зээл гэх мэт асуудлаар хэдэн жил дамнан хэрүүл хийх шаардлагагүй. Гэвч бид хамгийн олон удаа зурагтаар харсан, сошиалд гарсан, гар барьсан, уулзалт зарласан, бас ухуулагч олонтой таньдаг чөтгөрөө сонгодог. Үүнийг хамгийн сайн ашиглаж чаддаг нам бол МАН.
Орон нутагт хүн ам цөөн учраас энэ удаад "царцаа" шиг хэрэгтэй зүйл үгүй. УИХ-ын энэ жилийн ээлжит сонгуулийн цаг хугацааны хуваарьт зааснаар 2024 оны 4 дүгээр сарын 29-нөөр иргэний шилжит хөдөлгөөнийг зогсоох ёстой. Тэгэхээр УИХ-ын гишүүд хийгээд нэр дэвшихээр зэхэгсдэд царцаа зөөвөрлөхөд сар гаруйн хугацаа байна.
Ёстой мөрийцсөн ч алдахгүй хэмээн гар барьж болох статистик бол “2024 онд Улаанбаатараас орон нутагт шилжигсдийн тоо өмнөх онуудаас хавь илүү гарна”. Ингээд нэг талаар МАН-ын Засгийн газрын “Хөдөөгийн сэргэлт”-д багагүй "хувь нэмрээ" оруулж, хотын төвлөрийг сааруулж, хөдөөд шилжигсэд нэмэгдсэн гэх тоон үзүүлэлт гарна.
Гэтэл бодит байдал дээр хэзээ ч орон нутагт ажиллаж, амьдрахгүй царцааны нүүдэл явагдах нь ойлгомжтой. Ердөө л Улаанбаатарт байгаа нэг компанийн ажилчдын сүрэг нүүдэл төдий. Нүүдэл эхэлсэн гэдгийг эх сурвалжууд ч хэлж буй. Харамсалтай нь, үүнд хариуцлага тооцох ямар ч тогтолцоо байхгүй. Хэн ямар зорилгоор, яагаад орон нутагт суурьшсан тухай бодит тоо баримт ч гарахгүй.
Тиймээс Булгантуяаг таних, танихгүйдээ биш, Булгантуяагийн 4 жилийн өмнө ярьснаас биелсэн зүйл бий юу. Улс орны эдийн засгийн өсөлт таны амьдралд мэдрэгдэсэн эсэхийг эхлээд нэг тунгаая.
Түүнээс танилын нүүр халуун, таньдаг чөтгөр дээр гээд сонголтоо сохроор үнэлээд байх цаг нь биш. Сонгуулийн санал хураах өдөр 108 хоногийн дараа...
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.