ЯПОН: Армийнхаа бие бүрэлдэхүүнийг нэмэгдүүлэхийн тулд шивээсний хорио цээрийг цуцлахад бэлэн байна

Цэргийн алба хаах бэлэн хүн амын тоо эрс буурч байгаатай холбогдуулан Японы зэвсэгт хүчин биен дээрээ шивээстэй хүмүүсийг армид элсүүлэхийг хориглосон шийдвэрээ эргэн харж байна.

Японд шивээс нь якузагийн гэмт бүлэглэлд харьяалагддаг гэсэн утгаар тус улсын амьдралын олон салбарт шивээс хийлгэхийг эртнээс хориглосоор ирсэн. Харин одоо эрх баригчид залуус загварын чиг хандлагыг дагаж шивээс хийлгэж, тэрчлэн якузатай өөрийгөө адилтгахыг эрмэлздэг болсон тухай ярьж байна.

Сүүлийн үеийн судалгаанаас үзэхэд Японы армийн бие бүрэлдэхүүн тогтоосон тооноос 10%-аар дутуу байгаа юм. Өнгөрсөн оны хаврын цэрэг татлагын үеэр биедээ шивээс хийлгэх залуучууд олон байсантай холбоотойгоор  хангалттай тооны цэрэг татаж чадаагүй.

Эрх баригч Либерал ардчилсан намын гишүүн Масахиса Сато "Шивээс хийлгэсэн хүмүүсээс татгалзах нь ажиллах хүчийг бэхжүүлэхэд бэрхшээл учруулдаг" гэсэн бол Японы Батлан ​​хамгаалах яамны боловсон хүчний товчооны дарга Казүхито Мачида мөн Японд төрөлт буурч байгаатай холбогдуулан шивээсний хоригийг  батлан хамгаалахын салбарт нэн түрүүнд эргэн харах ёстой гэж үзэж байна.

Япон улс 125 сая хүн амтай. 2022 онд тус улсад 800 мянга хүрэхгүй хүүхэд мэндэлсэн байна. Харьцуулбал 1970-аад онд жилийн төрөлт 2 сая гаруй хүн байжээ.

Ерөнхий сайд Фумио Кишида Япон улс хумигдаж, хөгширч буй хүн амынхаа асуудлыг  одоо шийдэх үү, эсвэл хэзээ ч үгүй юү "  гэсэн сонголтын цаг үетэй тулгараад байгаагаа  мэдэгдэв.

Сүүлийн жилүүдэд Японд олон нийтийн санаа бодол дэлхийн хоёрдугаар дайны дараа тунхагласан энх тайванч бодлогоосоо татгалзаж, зэвсэгт хүчнээ бэхжүүлэх гэсэн хандлага улам бүр нэмэгдсээр байна.

Энэ нь Хятадын хүчирхэгжилт, Хойд Солонгосын үйл ажиллагаатай холбоотой юм.

Ази-Номхон далайн бүс нутгийн хурцадмал байдал, Оросууд Украин руу довтолж байгаа нь Япон улсыг батлан ​​хамгаалах бодлогод томоохон өөрчлөлт хийхэд түлхэж байна.

Эх сурвалж: ВВС