Засгийн газрыг гурван удаа тэргүүлсэн Италийн Ерөнхий сайд асан Сильвио Берлускони 86 насандаа таалал төгсчээ.
Тэрбээр архаг миеломоноцит лейкеми өвчнөөр шаналж, химийн эмчилгээ хийлгэж байжээ. Берлускони Миланы Сан Раффаэлийн эмнэлэгт сар гаруй хэвтсэний дараа нь зургадугаар сарын 9-нд дахин эмнэлэгт хэвтсэн байна.
Берлускони ОХУ-ын Ерөнхийлөгч Владимир Путины хамгийн дотны найзуудын нэгд тооцогддог байв. Тэрээр Крымийг Оросын нэг хэсэг гэдгийг илээр хүлээн зөвшөөрч, 2015 оны есдүгээр сард тус хойг руу нисч, Путинтэй ганцаарчилсан уулзалт хийсэн юм.
Украинд дайн эхэлсний дараа Италийн Ерөнхий сайд асан Путинд сэтгэл дундуур байна гэж мэдэгджээ. “Би сүүлийн үед Путинээс юу ч сонссонгүй. Бид маш сайн найзууд байсан, би энэ ажиллагааны эхэнд хоёр удаа утсаар ярьсан ч ганц ч хариу аваагүй” гэж Берлусконигийн хэлснийг Ил Мессаггеро иш татав. Үүний зэрэгцээ тэрээр дайнд Украины Ерөнхийлөгч Владимир Зеленскийг буруутай гэж маргасаар байв. "Хэрэв тэр Донбасс дахь автономит хоёр бүгд найрамдах улс руу дайрахаа зогсоосон бол ийм зүйл болохгүй байсан. Би энэ эрхмийн зан авирыг маш их сөрөг үнэлж байгаа” гэж тэр хэлж байжээ.
Берлускони бизнесиийн салбараас Италийн улс төрд анх 57 насандаа орж байв. Тэр 1994 оны 1-р сард тэр "Forza Italia" намыг байгуулж хоёр сар буюу ердөө 60 хоногийн дараа тус нам парламентын сонгуульд ялалт байгуулжээ. Намын гол түшиг тулгуур нь хөл бөмбөгийн "Милан" клубын хөгжөөн дэмжигчид байв.
Гэсэн хэдий ч жил хүрэхгүй хугацааны дараа буюу 1995 оны нэгдүгээр сард Берлускони огцорчээ. Тэрээр 2001 онд дахин Ерөнхий сайдын албыг хаших боломжтой болж, 2006 он хүртэл Засгийн газрын тэргүүнээр ажилласан. Хоёр жилийн дараа Берлусконигийн нам болон түүний холбоотнууд 2008 оны сонгуульд үнэмлэхүй ялалт байгуулжээ. Энэ удаад Берлускони 2011 оны арваннэгдүгээр сар хүртэл Ерөнхий сайдаар ажилласан. Тэр хамгийн сүүлд Ерөнхий сайдын суудлаас огцорсон нь хэд хэдэн дуулиантай холбоотой байв. Тухайлбал, албан тушаалаа урвуулан ашигласан, эдийн засгийн хямралын үед санхүүгийн луйвар хийсэн, Европын биржүүд Италийн өрийн үүрэгт үл итгэсэн хэмээн буруутгажээ.
Тэрээр Европын улсын засгийн газрыг тэргүүлсэн анхны тэрбумтан юм. 2005 онд "Форбс" түүний хөрөнгийг 12 тэрбум доллараар үнэлж, дэлхийн хамгийн баян хүмүүсийн чансааны 25-р байранд эрэмбэлэгдэж байв.
Эх сурвалж: Мoscowtimes.ru
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.