Одоогийн Ирланд, Их Британи орчимд амьдарч байсан эртний кельт үндэстнүүд сүнсний баяр буюу Хэллоуиныг анх тэмдэглэж эхэлсэн гэж үздэг. Тэд аравдугаар сарын 31-нд зуны төгсгөл өдөр хэмээн үздэг байж. Тиймээс хүйтэн өвлийн эхний өдөр буюу арваннэгдүгээр сарын 1-нд амьд болон үхэгсдийн ертөнц нийлдэг учраас сүнснүүдийг тайтгаруулахын тулд том түүдэг асааж, гэрийнхээ үүдэнд хоол хүнс тавьж, өөрсдөө гудамжаар амьтны арьс нөмрөн явах болжээ.
Энэхүү уламжлалт ёслол хувирч өөрчлөгдсөөр өнөөдөр хүүхэд, залуучуудын хувьд нэгэн зугаатай баяр болон аймшгийн сэдэвт багт наадам хийж, багачуудыг амттанаар дайлах зэргээр тэмдэглэдэг.
Харамсалтай нь, энэ баярыг тохиолдуулан зарим оронд элдэв төрлийн гэмт хэрэг гарах тохиолдол нэмэгдсэн учраас улс орнууд зөвхөн энэ өдөрт зориулсан хууль, журам гаргасан байдаг аж. Өнгөрсөн жил Сөүлд залуус олноор нэг гудамжинд цугларснаас болж, хөлд даруулж, амь насаа алдсан тохиолдол гарсан юм.
Тиймээс дэлхийн томоохон хотуудын захиргаанаас “Сүнсний баяр”-аар олон хүн цугласан газарт аль болох очихгүй байхыг уриалах болжээ. Монголд гэхэд бүх шатны боловсролын байгууллагад энэ баярыг тэмдэглэхийг хориглосон байдаг.
Хэллоуины баярыг тэмдэглэхийг хязгаарласан ихэнх хууль, журам нь нийгэмд харш зан үйл, олон нийтэд аюул учруулахаас урьдчилан сэргийлэх зорилготой байдаг.
Хэллоуин гэж баяр байхгүй
Иордон улс нь “Halloween” баяр тэмдэглэхийг бүхэлд нь хориглодог. Тиймээс АНУ-ын Элчин сайдын яамныхан Хэллоуины үдэшлэг зохион байгуулахдаа хувцсаа ирээд өмсөөрэй хэмээн зөвлөдөг байна. Хэдийгээр АНУ-д энэ баярыг өргөн дэлгэр тэмдэглэдэг ч зарим мужид хязгаарлалт бий.
Тухайлбал, Муссури мужийн Беллвилл хотод нас насны онцлогт тохирсон хязгаарлалт үйлчилдэг. Наймдугаар ангиас дээш насны хүүхдүүд элдэв баг зүүсгэл зүүж, бусдыг мэхлэхийг хориглодог байна. Виржиниа мужийн Чесапик хотод 2019 оныг хүртэл Сүнсний баярт 14-өөс дээш насныхан оролцвол хорих хүртэл ялаар шийтгэнэ гэдэг байжээ.
Жоржиа мужийн Дублин хотод 16-аас доош насныхан олон нийтийн газар баг зүүхийг хориглодог бол Калифорниа мужийн Волнат Крикт баг зүүхийн тулд заавал шерифээс тусгай зөвшөөрөл авах шаардлагатай аж. Мөн хувийн компаниуд ажилтнууддаа энэ өдөр элдэв баг зүүхийг хориглох эрхтэй байдаг.
Тэгвэл Англид цагдаагийн хувцас өмсөхийг хориглодог. Хэрвээ энэ хоригийг зөрчвөл 6 сар шоронд хоригдож, маш өндөр торгуульд унаж болзошгүй. Та хэн нэгэнд хохирол учруулаагүй бас энэ тухайд огт мэдээгүйн улмаас цагдаагийн хувцас өмссөн ч байсан 1000 фунт стерлингээр торгуулна.
Алиалагч байж болохгүй
Алиалагч гэх дүр зураг аймшгийн, элдэв гэмт хэрэгтэй кинонд тэргүүлэх байр эзлэх болоод удсан. Тиймээс Францын Вендаргес тосгон алиалагчийн хувцас өмсөхийг хориглодог.Мөн орон нутгийн удирдлагуудын тусгай зөвшөөрөлгүй бол элдэв баг хувцас өмсч, баяр наадам хийхийг хориглодог. Английн Бедфордшир хотын цагдаа нар “ Хэллоуины баяраар бусдыг айлган сүрдүүлсэн, гэмт хэрэг үйлдсэн, бусдад хохирол учруулсан хэнийг өршөөхгүй. Цаашид энэ зан үйлийг байх эсэхийг нухацтай авч үзэх шаардлагатай” гэж үздэг.
Алабама мужид христийн болон бусад шашны санваартны хувцас өмсөхийг хориглодог. Хэрвээ үүнийг зөрчвөл 500 фунт стерлингээр торгож, нэг жил хүртэл хорьдог байна.
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.